Aizawl Municipal Council politics

MPC ṭhalai thuchhuahin a tarlan danin MPC aṭanga Aizawl Municipal Council-a councillor pahnihte chu an thawhpuite'n thlauhthlak an tum niin a lang a, "Ar talh dan chi khat chauh a awm lo," tiin thlauhthlak tumtute hi an vaukhan zui a ni.

AMC hian a term khatna pawh a la hmang zo lo a, chuti chung chuan a chhungah boruak duhawm lo tak tak a thleng ta fo mai. Mizo mipui nawlpui hian Municipal Council nihna hi kan la hre chiang tawk lo a, khawpui lian danga an kal anga an kal theih hunah phei chuan an thihtihtheihzia leh sum leh pai pawh an khawih lenzia kan la hre dawn chauh a; tuna Municipal Council awmzia hre chinte an innêka an buai nak nak pawh hi thil mak tak chu a ni hran lo.

AMC hian sum leh pai lian tham a khawih a, hna insem leh mahni bialte duhsak thilah pawh inhmuh thiam loh theih tak a ni ang. Tun hnaia MPY ṭhalaite thuchhuah hi eng anga dik leh dik lo nge a nih hriat chian theih ni lo mah se, tuna AMC-a roreltu political party insuihkhawmte inkarah boruak ṭha tawk lo a awm niin a lang. An inhmuh thiam loh chhante hriat theih ni lo mah se, tun hnaia AMC awm dan en hian helam buaipuitute chuan thil awm dan chhui zawn tur an hrethiam thei awm e.

Engpawhnise AMC hi a term khatna hmang mek chauh a ni a, a hruaitu bawra boruak hrang hrang a awm fo mai hi chu a zialo ngawt mai. A thlengtu mipuite zah vang tal pawhin awm dan tawk hi chu hriat ve ni se a ṭha khawp mai a, thlan tlin an nih tawh hnua an chet zui dan hi mipui lam chuan an thlir zui zel dawn a ni.

Municipal Council thuneihna sanzia leh thil tih theih tamzia kan hre chiang chho zel ang a, Aizawl Municipal Council pawh hi kan en dan a dang chho hret hret ang. Councillor nih inchuhna leh Municipal Council-a roreltu nih inchuhna hi tun ai hian kan la kalpui na zawk dawn a nih hmel a, engpawhnise an rorel sak Aizawl mipuite hamṭhatna hi dah pawimawh hmasa ber fo rawh se.