Zu, lirthei leh Traffic Police

Tun hnaiah lirtheia chetsualna a thleng tam hle mai a, lirthei chetsual chhan tam tak hi a khalhtu zu ruih vang a ni.

Lirtheia chet sualna ṭhenkhat hi chu pumpelh theih loh vanduai vang a ni a, chet sualna ṭhenkhat hi chu inthlahdah vang a ni ṭhin a, pumpelh theih chet sualna hi tam tak a thleng. Heng zinga langsar ber chu zu rui chunga lirthei khalh hi a ni a, he thil pumpelh dan hi tun aia nasa zawka ngaihven a ṭha khawp mai.

Mizoramah zu zawrh a ni dawn a, zawrh ṭan hmain MLPC Act hnuaiah zu ruite hremna dan thar hman ṭan a ni a, an inhrem dan pawh ṭha titu mi ṭhahnem tak an awm. He dan hman a nih hnu hian lirthei khalhtu zingah zu rui an awm leh awm loh hi tun aia tam hian endik ni thei se a ṭhain a rinawm a, zu rui chunga lirthei khalh ven dan ṭha zawk hi ngihtuah a ngai hle a ni.

Lirthei chet sualna tam tak hi zan lama thleng a ni a, Traffic Police-te hian tun aia zing hian zan lamah lirthei kahlhtute hi endik thei se a ṭha a, an indaih loh leh an thawhrim dan hi mipuiin an hriatpui vek chung hian, tun ai hian zan lamah khauh lehzual se a ṭha ngei ang. Hei hian khawpui chhunga zan lama rui chunga lirthei khalh ṭhin hi thui tak a veng ngei ang.

Khawpuiah kher loah pawh police check gate a awmna khaw tinah police duty-te hian lirthei khalhtute hi tun aia uluk zawkin vil se, rinhlelhawm deuhte chu zu an rui nge rui lo enfiah ṭhin se, zu rui/zu nam chunga lirthei khalh chu dan angin hrem zel se chet sualna tam tak hi pumpelh theih a nih a rinawm.