Motor loan sum tihchingpen chhuina

Mizoram Police chuan Mahindra & Mahindra Financial Services Ltd. hmanga cheng vbc. 150 vel tihchingpenna, Mizoram mai ni lo, Assam thlenga nghawng nei an chhui a, an chhuina report (chargesheet) pawh Aizawl Chief Judicial Magistrate-ah an thehlut tawh a, an la chhui mek zel bawk. Chargesheet-ah mi 20 hming a lang a, chu'ng zinga mi 12 chu Mizo an ni a, an zinga pali chu car dealer an ni.

Mizoram chhunga sum tihchingpenna lian tham tak hriat chhuah a ni leh, Mizoram Police-in ṭha tak leh chak taka an chhui thei hi a lawmawm a; hun rei lo te chhunga chargesheet an thehlut thei pawh a lawmawm.

Hetih lai hian, Mizoram Chamber of Commerce & Industries hruaitute chuan July 15, 2024-a press conference an neihah, Mahindra & Mahindra Financial Services Ltd kaltlanga sum tihchingpennaah Mizorama lirthei zuartute'n, thiam lohna an nei lo niin an puang ve thung a; MMFSL-in motor loan an pek chhuah dan an sawifiah.

Police-in thubuai an chhui mek laia pawl dang daihin press conference hial neia police hnu chhuina chungchang an lo sawi hi a mak hle mai a, Mizorama thil thleng khát tak a nih a rinawm.

Hetianga police thil chhui laia pawl dang daihin press conference neia an ngaihdan an lo puangzar ve hian, eng angin nge hnu chhuinaah leh mipuiah nghawng a neih ang sawi theih a ni lo a; hnu chhui tibuai thei a ni ang em tih ngaihtuah theih tak a ni.

Police thuchhuah tarlan danin, MMFSL kaltlanga motor/vehicle loan sum tihchingpen chungchangah hian chhui zui tur a la awm zel mai thei a, thubuai pawh a la luh belh zel mai thei. Police-te hian thâ thlah loin, theihtawp chhuahin chhui zel se; khawi emaw aṭanga nawrna leh dodalna a awm a nih pawhin huaisen takin, hleih nei hauh loin chhui zel rawh se.