Birth certificate lem
MZP sub-headquarters, Tlabung chuan thuchhuah siamin, Bangladesh aṭanga Mizorama dan loa pêm lut Chakma-te birth certificate siamsak an nih tawh loh nan leh birth certificate lem an neih tawh loh nana hma la turin Mizoram sorkar an ngen.
Bangladesh aṭanga pêm lut Chakma-te'n Mizoram chhungah birth certificate an nei a nih ngat chuan thil pawi tak a ni a, sorkarin ngun taka a ngaihzuah a, a ṭul anga a bawhzui a ngai ang. Birth certificate ber awlsam taka neih theih a nih chuan Mizoram leh hnam tan thil him lo a ni thei a, hna dang mai pawh ni loa ram dang aṭanga pêm lutte tana birth certificate lem petu sorkar hnathawk an awm a nih chuan hrem ngei chi a ni ang.
Miin birth certificate ber a neih tawh chuan khua leh tui nihna a nei tluk a ni tawh a, chutianga foreigner ni ngei si hnena birth certificate lem pek chhuah theih a nih chuan thil fel lo lian tak a thleng tihna a ni. Hei hi ram leh hnam humhalh tura ke kan pen meknaah pawh kan ngaimawh tur thil a nih hmel a, he thil hi a tak a nih ngai chuan birth certificate lem petute hi sorkar hian dan angin a hrem ngei tur a ni ang.
Tun hnaiah ram dang aṭanga pêm lutte hnena birth certificate leh document dang lo siamsak mai ṭhin an awm hi a pawi takzet a, driving license leh passport-te thlengin pêm lutte hian an siam thei tawh a, hei hi thil pawi tak a ni. Hetiang thil a thlen theih chhan chu sorkar hnathawk zingah thil fel lo taka ti ṭhin an awm tihna a ni a, sorkar hian a hnathawkte hi thununin zilh ṭhin se, man chhuah a nei a nih chuan hrem ngei pawh a ṭha ang.