MPF ṭang mar zel se

Mizorama inthlanna dik leh thianghlim a awm theih dan tur ngaihtuahin Mizoram People Forum (MPF) leh political party-te chu tun hnai khan an inkawm a; inthlana MPF leh political party-te thawhhona thuthlung awm tawh sa an ennawn bakah, village council, local council leh Aizawl Municipal Council inthlan lo awm turte bakah Autonomous District Council inthlan lo awm tura thawhho dan turte an sawiho.

Mizoramah hian pawl hrang a tam hle mai a, heng pawh zinga ram tana thawhhlawk ber pakhat chu MPF hi an ni ang. MPF-ah hian Mizorama kohhran hrang hang an tel deuh vek a, NGO liante an tel deuh vek bawk a, inthlan dawna an hnathawhte avangin fak a hlawh ṭhin hle.

MPF-a telte hi mihring ve mai an ni a, pawl leh kohhran hrang hrang aiawhte ni bawk mah se mimalin ṭan lam leh âwn lam neite an ni ve hlawm a, hei vang hian MPF pawhin sawisel a kai phah deuh ṭhin. Hei vang hian MPF hi ṭan lam nei pawl a ni ta tihna a ni lo a, khawilaiah emaw MPF hruaitu hming pu sia ṭan lam nei an awm avang hian MPF hi hmuh tleu leh sawisel mai chi niin a lang lo a, a MPF hruaitu lam zawk thiam loh a nih hmel.

MPF hmalakna ṭhenkhat hi a fel tawk lo ve thei tho a, an thil kalpui dan pawh tute emaw tana ṭha bik leh tute emaw tana chhiatpui theih a ni thei a, heng thilah hian MPF pawh a fimkhur deuh deuh a ṭul ang. Hei vang hian MPF ṭangkaina hi hmuh hmaih tur a ni lo a, MPF awm hma leh awm hnua Mizorama inthlanna hrang hrang hi thlir ila, MPF ṭangkaizia chu a chiang a ni.

Tun hnaia inthlan lo awm turah hian MPF hi insang marin ṭan la thar leh se, Mizoram tan MPF pawimawhna leh ṭangkaina lang chhuak zual zel rawh se.