Hnam leh sakhaw inzahsak

Union Agriculture and Farmers Welfare minister Radha Mohan Singh chu Mizoramah lo zinin Pathianniah State Guest House-ah Mizoram sorkara department hrang hrang hotute a kâwm a; an hmasawn dan leh sum an hman dan te, sorkar laipui scheme hrang hrang an bawhzui dante a thlir lêtpui. MPC party office bearer ṭhukhawm chuan Mizoram sorkar chu Mizote sakhua, Kris-tianna ngai pawi-mawha humhim ngam turin a phut.

Union minister a ni a, hun a nei lo hle ang tih a chiang a, chuvangin Pathian-niah a hun neih ang angah Mizoram sorkar hotute a ko khawm a nih hmel. Ama thlirna lam aṭang chuan thil tiṭha hleah a inngai mai thei a; nimahsela Mizoramah chuan Pathiannia sorkar hna kaihhnawiha meeting hi loh theih loh thilah lo chuan tih ngai loh a ni.

He minister hian Mizorama a hun hman dan tur hi a hre sa vek a, Pathiannia hun hmang tur anga thil a duang hi a fel lo hle. Hmun hrang hrangah chin dan ṭhan a inang lo a, kan sakhaw biakte pawh a ni ang lo. Sakhua leh hnam tihdan inzahsak hi kan tih tur a ni a, union minister-in Mizorama hun hmanga Pathianni khera sorkar department hotute a ko khawm hi chu a tawpna ni se a ṭha khawp mai.

Mizoram sorkar tan hei hi dan theih a ni hauh lo ang a, union minister programme a nih vangin hnial thei an ni lo. Heti chung hian ngaihdan erawh sawi thei lo tawp an ni bik lo a, hetianga programme duang an awm chuan kan tih
ṭhan loh a nihzia leh Mizoramah chuan Pathiannia in koh khawm a remchan loh thute pawh thlen ngam se a ṭha. Union minister leh sorkar laipui aiawhten hei hi an ngai pawimawh loa an tilui a nih chuan sorkar hnathawk chuan an zawm ve mai tur a ni ang a; nimahsela mipui vantlang chuan an pawm lo hle ang.

Khawi hmunah pawh, hnam leh sakhuain chin dan ṭhan kan nei ṭheuh a, hei hi union minister a ni emaw, hotu lian ber pawh ni se an zah ve tur a ni.