Mizo kan inpumkhat a hun e

Tun hnaiah Assam sorkar leh Assam-a cheng mi ṭhenkhate'n Mizoram chhung hmun hrang hrangah buaina an rawn siam a, he mi kal zelah hian Assam leh Mizoram ramri hmun ṭhenkhatah buaina a chhuak.

Buaina chhuahna hmunte hi ramriah zel a ni a, buaina chhuah chhan pawh Assam lamin Mizoram chhungah buaina an rawn siam hmasak vang zel a ni. Assam hi an ṭhalai hawklak intel khawm emaw, eng pawlin emaw buaina an rawn siam a ni lo a, sorkar mi Assam police-te nena rawn thawk chhuak an ni deuh zel a; kawng danga sawi duh phei chuan Assam sorkarin Mizoram chhungah harsatna an rawn siam a ni ber mai. 

Heng Assam police-te leh an mipuite hi Mizo mipuiin an theihna zawnah an lo dang a, hmun ṭhenkhatah chuan na takin an bei lêt bawk a; sorkar pawhin theihtawp a chhuah a, police-te pawh ramri humhalh tura tirin ṭan an la zui bawk.

Sawisel tur zawng tan chuan kan sorkar chet danah emaw, an chet muan danah emaw, an chet loh dan thlengin sawisel tur a awm thei ang a; fakna tur lam zawn pawhin kawng tam takah sorkar hi fakna tur a awm. Chutianga insawisel leh infak chiam hun chu a ni lo a, kan zavaia kan ram chhana kan ṭan rual ve a hun ta. Tute emaw hming ṭhatir tuma thu thehdarh leh thlalak thehdarh hun a ni lo a, tute emaw dem zawnga thu thehdarh pawh tih loh tawp tur a ni. 

Do inang kan nei a, chhan tur ram thuhmun kan nei a, hetiang hunah pawh Mizo nihna aia political party-a kan nihna kan dah san zawk a; kan ṭanrualna tur hun pawimawhah pawh ṭang rual thei loa kan insel zel a nih chuan he ram leh hnam hmabak hi a ngaihtuahawm hle thei a ni. Chutihlaiin kan zavaia inpumkhata kan awm a, kawng hrang hranga kan inpuih tawn a, kan theihna zawn ṭheuha sorkar kan thlawp tlat chuan he harsatna kan tawh mek hian Mizoram tan rah ṭha a chhuah ngei i beisei ang u.