Sorkarin sum a pûk chungchang

Mizoram sorkar chuan tun July thlaah hian Open Market Borrowing (OMB) hmangin cheng vbc. 90 a pûk leh a tum a, a pûk tawh zawk hial mai thei; chu nen chuan sorkar sum kum kal mek 2024-25 chhungin ah OMB hmangin cheng nuai 361 a pûk tawh.

Kum kal mekah OMB hmanga sum pûk tur zat ruahman chu vbc. 1,170 a ni a, sorkar kum liam ta 2023-24 khan cheng vbc. 1,200 pûk tura ruahman a ni thung. Kum kal mekah hian OMB hmangin May 2024 tàwp lamah cheng vbc. 200 leh June thlaah vbc. 71 pûk a ni a, a ṭum thum nan vbc. 90 pûk leh a ni.

Mizoram sorkar sum dinhmun ṭhat loh thu te, state-in sum lak luhna ṭha a neih lohziate hriat tlân a ni a; chuvang chuan sorkarin sum a pûk ṭhin hi tih loh theih loh anga ngaih theih a ni. Hei hi mipui pawhin kan hriatthiam a ngai.

Sorkarin sum a pûk ṭhin rualin, pûk tam lo thei ang ber tura ngaihtuahna hman a, inruahman a, inrenchem a ngaihna lai apiangin inrenchem a ṭul. Loh theih loha sum pûk a nih pawhin, sum chu dik tak, hlâwk leh ṭangkai thei ang bera hman a pawimawh.

Mizoram sorkarin sum a pûk ngei ngei a ngai a nih chuan pûk mai tur a ni a, pûk belh zel pawh a la ngai ṭhinin a rinawm; mipui pawhin kan hriatthiam zel a ngai ang.

Sum pûk sawisel chungchangah, sawiseltu eptu party mite leh mi ṭhenkhatte hian sorkarin sum a pûk hrim hrim hi an sawisel ber a ni lo mai thei a; an sawisel chhan zawk chu - sorkar hmasa lamin sum an lo pûk tawh ṭhin sawisel a, sum pûk ve lo tur anga insawi ṭhin an awma an hriat vang ni mai thei. Hei hian ṭawng zung zung a fuh lo thei a ni tih a tilang àwm e.

Insawisel hian ṭangkaina a neih châng a awm a, mahse, ram leh hnam hmasawnna tur leh thil ṭha duhna vang ni thei se. Chuti ni lo a, khingpui party-te thil tih a nih vanga insawisel ngar ngarna hian rah ṭha a chhuah mawh ṭhin tih hriat a ṭul e.