Ni 40 hnuah FIR la thehlut lo

National Health Mission (NHM), Mizoram hnuaia dental surgeon anga hna thawk ṭhin pakhat chuan zirna lama lehkha pawimawh (document) lem a hman avangin bànna a thehlut a, a lakah hian Health & Family Welfare department hotute chuan first information report (FIR) thehlut an tum thu an sawi.

Document lem hmanga dental surgeon hna thawk an awm tih kumin May thla tàwp lam khan hriat chhuah a ni a, chu mi chuan June 5, 2024-ah bànna a thehlut. Amah hi February 23, 2023-a NHM-a thawk tura lâk, kum khat leh thla 6 vel chhung thawk hman a ni.

Document lem hmanga sorkar hna thawk a, dâwt hmanga sorkar aṭanga hlawh cheng tam tak latu hian hrem a phú-ah a ngaih theih a; sorkar aṭanga sum (hlawh) a lo lak tawhte pawh chhuh lêt bakah, hrem ngei phú thei bawk àwm e.

HFW department hotute pawhin decoment lem hman chu an ngai thutak a, ngawihbopui chia a ngaih loh thu leh FIR thehluh an duh thu an sawi reng chunga tun thlenga FIR an la thehlut lo nia lang hi a mak hle.

Document lem hmang an awm tih hmuh chhuah a nih hun chu sawi loh, document lem hmangtuin bânna a thehluh aṭanga ni 40 chuang a liam tawh hnu pawha HFW department hotute'n FIR an la thehlut lo leh FIR thehlut tura an la inbuatsaih reng hi thil mak tak a ni.

Document hmangtuin bànna a thehluh hnu lawkah HFW department hotute'n FIR thehluh an duh thu an lo sawi tawh a, chumi aṭang pawh chuan ni 40 vel a liam tawh. Pawi khawihna leh dan loa thil tih a awmin sorkar ang a ni emaw, pawl leh mimal ang a ni emaw, a rang thei ang bera FIR thehluh a nih ṭhin laia NHM-a document lem hmangtu lakah ni 40 chuang a liam hnu pawha FIR thehluh a la ni lo hian ngaih a tiṭha lo thei hial a ni.