High Court order mipuiin ṭha an ti

Gauhati High Court Aizawl Bench chuan India ram páwn khawchhak lam aṭanga dan loa Mizorama kuhva rah tawlhrûk chhui turin CBI a hriattir a; hemi chungchangah hian July 16, 2024 khan High Court chuan judgement order a tichhuak a ni.

Mizorama ram dang kuhva tawlhrûk chhui hna High Court-in CBI kuta a dah hi a lawmawm a, Mizoram mipui tam ber chuan ṭha an ti niin a hriat a, sawi zui pawh a hlawh hle. CBI chhui tura High Court-in a dah theih chhan hi mimal ṭhahnemngaiin hma a lak vang leh High Court-a PIL a thehluh vang a ni a, a fakawm.

Mizorama dan loa thil tih leh chêtna dangah pawh phun ral mai lo a, dan anga hmalak zel a ṭha a; chutianga tih chu mi tu emaw tih tur bik a ni lo a, anni kuta dah tur bik a ni lo a, mi dangte pawhin hmalak nachâng hre zel ila a ṭha khawp ang.

Kuhva rah tawlhrûk chungchang CBI chhuitir hi Mizoram sorkarin hnialna leh dodalna a neih loh thu High Court a hrilh tih Court order-ah tarlan a ni a; hetianga sorkarin chak zawka chhui thei tur kuta dah a hnial lo hi a lawmawm a, kuhva tawlhrûk tihtawpna turah nasa takin awmzia a neih a, rah ṭha a chhuah ngei a beiseiawm.

Dan loa kuhva rah tawlh chungchang hi political party-te'n inbeih nan an hmang fo a, tun thlengin an la hmang a; sorkar lai ni lo party apiangin sorkar beihna atan an hmang niin a lang. Mahni sorkar laia thapui thawha kuhva rah tawlhrûk vei lo leh titawp tura ṭan la tak tak duh si lo a, sorkar tawh loh hnua sorkar lai beihna atana hman leh chiam si hi ram tan a hrisel lo thei a, kuhva tawlhrûk tihtawp duh tak takna vang a ni lo thei bawk.

Kuhva tawlhrûk tihtawp turin sorkarin nasa takin mawh a phur a, nasa lehzuala ṭan a lak a ngai. Kuhva tawlhrûk titawp tura ṭawngkam an lo neih tawhte pawh chak zawka bawhzui zel a ṭul. Sorkar chakna ringawt hmanga tihrêm a harsa viau thei; political party dangte'n inbeihna atan ringawt hmang lo a, sorkar tha an tihchak a ṭul a, pawl dangte leh mipui pawhin sorkar an ṭawiawm ṭhat a ṭul a ni.