Private hospital-te leiba kha

Mizoram sorkarin thisen dawngtute aṭanga senso phu-hrûkna tur, blood processing fee a lak chu Aizawla private hospital-te'n Aizawl Civil Hospital-a blood bank-ah Rs. 30,58,300 an batsak mek.

Private hospital-te'n ACH Blood Bank aṭanga thisen an laka thisen sawngbawl man an pe ṭha lo chuan sorkarah harsatna a thlen mek niin an sawi a, hei hi a pawi hle. Private hospital-te hian damlo in-enkawlna senso bill an siamnaah damloten ACH aṭanga thisen an lakna senso chu an bill tel tho a nih phei chuan, hei hi thil fel lo tak a ni.

ACH blood bank lam sawi ang hian private hospital-te hian thisen an mamawh a nih chuan a rang thei ang bera pek chhuah hi an mawhphurhna a ni a, mihring thih leh dam inkar thil a nih vangin pawisa inpek loh vanga inhnar chi a ni lo. Nimahsela pawisa pek tura tih a nih chuan pawisa hi chu an pe ve mai tur a ni a, leiba heti zat an nei hi chu private hospital ṭhan chak dan enin an inhmeh lo hle a ni.

Private hospital lam hian sawi tur dang an nei a ni mai thei a; nimahsela RTI Act chhanna aṭanga a lan danah hi chuan an damdawi-ina damlote hman tura thisen an la a nih chuan an thisen sawngbawlna man chu dan angin an pe ngei tur a ni. Damlote bill-ah damlo lamin an pe tel a nih phei chuan, damloin an thisen sawngbawlna tura pawisa an pek thlap chu private hospital-te hian sorkarah an pe lut lo tihna a ni thei a, a pawi khawp mai.

Engpawhnise RTI Act-a lang leh sorkar lam thu ni lo hi private hospital neitu lam hian sawi tur an nei mai thei a, harsatna an tawk a nih pawhin ngawih chuh ringawt hi chu a fel lo. Sorkara leiba an neih zat hi hun rei lo te chhung pawhin Rs. 30,58,300 a tling a, hei hi chu chinfel thuai a ngai a ni.