AMC chungchanga Court thupek

Gauhati High Court, Aizawl Bench chuan July 18, 2024 khan Bawngkawn-Durtlang inkar kawngpui kama Aizawl Municipal Corporation (AMC)-in in sak phalna leh lei laih phalna a pekte a sût.

Gauhati High Court thupek ang chuan, Bawngkawn-Durtlang inkar huam chhunga AMC-in lei laih leh in sak phalna a pek tawhte chu sût a nih bakah, in sak mekah chhâwng khat pawh la sak pum lohte chu in sak tihtawp nghal tur a ni.

Bawngkawn leh Durtlang Leitan inkar hi khâm a nih avangin lei laih a ni ṭhin te, in sak a ni leh mai ṭhinte hi Mizoram mipui, a bikin Aizawl mipuiin mak an ti a, an vei a; lei laih leh in sak rêng rêng awm tawh lo se tih hi mipui tam ber duh dan niin a lang.

Lei laih leh in sak chungchanga thuneitute chu dan kengkawh tur leh lei laih leh in sak phal lo turin mipuiin an beisei a; mahse, mipui beisei ang chu a hlawhtling thei meuh lo. Chuvang chuan mipuiin thuneitu - AMC an dem rawn mek a, mipui mithmuhah chuan an mualpho mek a ni.

High Court-in Bawngkawn-Durtlang inkar kawngpui bika AMC thuneihna a ṭhiat hi tute emaw tan chuan a mualphothlak tak zet a, mawhphurhna neitu, thuneitute tan chuan zah ngawih ngawihna tham a ni. Court thutlukna hian thuneitute'n Bawngkawn-Durtlang inkara an tih turte an tih lohzia a tilang a; inenfiah nan hmang rawh se.

Thuneitute'n an tih ngei tur an tih loh chhan hi an tih ngam loh vang emaw, an tih duh loh vang emaw, an tih theih loh vang emawte a ni thei ang. Tun hnuah chuan intilal tur ringawt ni loin, an nihna hian mawhphurhna a keng tel a ni tih hria se, chu an mawhphurhna chu hlen turin theihtawp chhuah se; dan an siam ang takin an tih tur ti se, dan kengkawh ngam tawh rawh se.