Gas bottling plant tharthawh

Mualkhang Gas Bottling Plant chu Indian Oil Corporation Ltd. (IOC)-in an tharthawh dawn a, cheng vbc. 225.71 sêngin an chei ṭha dawna sawi a ni. Chei ṭhatna atana sum sanction order pawh IOC Deputy General Manager-in Food, Civil Supplies & Consumer Affairs Minister hnenah July 22, 2024 khan a hlân.

Kum 2006-a bul ṭan tawh Mualkhang Gas Bottling Plant hi Oil Industry Safety Directorate guidelines-ah a tlin loh avangin January 2020 khan tihtawp a ni a; kum 4 chuang hnuah tharthawh leh a ni dawn ta hi a lawmawm. Tihpuitlin a nih chuan Mizoram leh mipui tan chhawrnahawm tak a ni ngei ang.

Mualkhang Gas Bottling Plant hman a nih lai khan Mizoram mamawh zawng zawng phuhru zo lo mah se, eirawngbawlna gas-a mamawh a chhâwk zângkhai hle a, Mizoram mipui tan a ṭangkai tak zet. Hun eng emaw chen tihtawp a nih hnua an tharthawh leh turah hian a hma aia lian zawk fé, gas dawng hlâwk zawk daih ni tura ruahman a nih avangin mipui tan a ṭanglai leh zual dawn a ni.

Gas Bottling Plant tharthawh leh a nih a, ruahman ang taka a puitlin chuan eirawngbawlna gas-ah Mizoram mipui kan hnianghnâr lehzual thei dawn a; eng vang pawha Silchar leh Mizoram inkarah kawngpui a pin pawhin harsatna nasa lutuk thleng loin mamawh a phuhru thei ngei ang.

Mualkhang Gas Bottling Plant kan nei leh tur hi a lawmawm em em a, a pawimawh tak zet bawk a, a puitlin ngei theih nan theihtawp chhuah ni se. IOC-in hma an lakna turah theihtawp chhuah se, Mizoram sorkarin a tih tur chinah leh a lo puih theihna lai apiangah ṭan lo lâkpui zel se a ṭha hle ang.

Sorkar department leh mipui lam pawhin gas bottling plant chei ṭhat leh tihlenna turah harsatna siam lo turin rilru nei lâwk ila; harsatna awm palh theiah pawh chingfel zung zung tura inbuatsaih lâwka hmalak ni se a lawmawm ngawt ang le.