Clean Mizoram

Mizoram pumah Clean Mizoram Movement chu hman ṭan a ni a, chief minister Lal Thanhawla'n a hawng a, faina hnatlang rûnpui neih nghal a ni. CM chuan, Mizoram mipuite chu mahni in leh lo ṭheuh aṭanga faina bul ṭan tur leh, khua/veng fai ber nih tum ṭheuh turin a chah.

India ramin prime minister thar a nei a, ani hian khawvela ram bâl zinga mi India ram then thianghlim a duh a, beihpui a thlak. Mizoramah pawh faina beihpui thlak a ni a, Mizoramin faina kawnga hma a sawn theihna turin state hotupa berin hmun phiatfaiin bul a ṭan a, state pumah faina beihpuithlak chhunzawm a ni.

Mizote hi tun hma chuan hnam bâl tak kan ni tiin an sawi ṭhin a, hei hi thil dik tak a ni. Hnam hnufual leh ziak leh chhiar pawh thiam lo hnam kan nih miau avangin kan bâlin kan ṭawp pawh kha a mak lo a; nimahsela ziak leh chhiar thiam ram, kawng tam taka changkang tak anga lang kan nih tawh hnu hi chuan balh hi kan inhmeh tawh lo a, chutihlaiin kawng tam takah kan la bâl hle si a ni.

Chief minister ho meuha faina beihpui thlak a nih takah chuan he state hi faina kawngah chak takin ke a pên thei ang tih ring ila, mipui nuai 10 bawr vel chenna ram hi ram fai zawkah kan chhuah thei tur a ni. Fai duhna tak tak thinlung nena sorkar tha chakna hmanga kan beih phawt chuan India rama state fai ber nih pawh hi thil harsa tak niin a lang lo a, kan ṭan tlan erawh a ngai ang.

He India ramah hian a ṭha zawnga ber nihna hi kan nei tam lo a, India rama state fai ber nih tum tak takin Mizoram sorkar hian ṭan la se, inzirtirna leh a hnathawh dan tur lam an duang fel a nih chuan thil tih theih a ni a, a tak chantir turin sorkar hian ṭan la ngam rawh se.