Thlai zawrhna

Champhai Grape Grower Society (CGGS) chuan, Radiant Manufacturer Pvt Ltd, Guwahati nen inremna thuthlung siamin kum tin grape tui litre 3,60,000 an pe ṭhin dawn a ni.

CGGS hruaituten state pawna mite nen inremna an siam thei hi an fakawm a, hei hian grape chingtute tan grape chin hi innghah ngamna a ni tih a tilang chiang zel a ni. Mizorama kuthnathawktute harsatna tawh lian ber chu an thlai thar chhuah hralhna an hmu lo ṭhin hi a ni a, hralhna an hmuh pawhin a hralhna man mumal thei lo leh hralhna rintlak zui lo ṭhin hi an buaina ṭhin a ni. Tuna lan danah hi chuan CGGS hruaitute hian inremna fel tak an duang a, an entawntlak khawp mai.

Mizorama sorkar ding tawhte hian thlai thar zawrhna lam hi ngaihtuahin an inngai ṭheuh ang a; nimahsela kuthnathawktute tana innghahna tham thlai thar zawrh dan ṭha hi chu an la hmu lo niin a lang. Kan rama kan thlai thar chhuah theih langsar tak sawhthingte pawh a lei duhtu an tam hle nia sawi ni mah se, a lei danah harsatna a awm zel a, hun rei tak chhung chu sawhthing huan neitute an buai hle a nih kha.

Tunah pawh thlai thar a lo chhuak zel a, sumchang thlaite ching turin kan inzirtir zel a, a tawpa kan buaina chu a hralhna lamah bawk a ni. Tun hma angin kan ram hi a kilkhawrin tlawhpawh a harsa tawh lo a, kawngpui ṭha kan neih bakah airport hial kan nei a, internet hmangin khawvel tukverhah kan dâk ve thei tawh bawk a, hetiang hunah hi chuan state dangin an duh tur chi kan thlaite hralh dan hi chu kan dap chhuak thiam tawh tur a ni.

Mi ṭhahnemngai leh a ngaihna hriate chuan state pawnah an thlai/ thei leh thlai aṭanga an thil siamte an hralh mek zel a, anmahniin a hralhna tur nen lam an zawng hmu thei zel a; kan thil thar chhuah hralhna zawng tura chak zawka ke kan pên hi a hun tawh takzet a ni.