Mizo ṭhalaite leh hnathawh

Chief Secretary hoin sorkar department hrang hrangte'n International Labour Organisation (ILO) leh United Nations Industrial Development Organization (UNIDO) hmanga Mizoram chhung leh páwna hna hrang hrang thawk thei tura ṭhalaite buatsaih dan tur tun hnai khan an sawiho a; he hunah hian Mizorama mihring awm 20% vel chu Mizoram pawn lam mi, hna thawka Mizorama awm an nih thu an sawi lan a ni.

Mizorama ṭhalaite zingah hnathawh hreh nei lo an pun zellaiin ṭhalai hna thawh tur hre lo an awm belh ve zel bawk a, hnathawh duh leh peih chin thliar an awm ṭhin avangin Mizoramah ṭhalai hna nei lo an pung niin a lang. Hetihlai hian Mizo ṭhalai, hnathawh hreh nei lo, mahni intodelh duh vanga state pawn thlenga vak chhuak ngam an pun belh zel ve bawk.

Mizoram chhunga chengte'n hnathawh tur hmu loa an insawi meklaiin state pawn lam aṭanga lo lutte'n hna an hmu zel a, heng mite hian hna hnuaihnung leh hrehawm zawk nia langte an thawk a, ei an hmu mai ni loin anmahni ram lama an chhungte an chawm thei bawk. Hei hi Mizo ṭhalaite hian inenfiahna atan an hman a hun a, he rama hna hmu loa kan awmlaia hna thawh tuma lo lut an pun zel avang hian 'hna' kan tih hi a inang lo a ni ngei ang.

Kan zirlai kalpui dante pawh hi kan ennawn a ngai a, thiamna hmantlak leh chhawr zui theih nghal a nih loh hi chuan sorkar hnaa luh hi a kâwk deuh ṭhin a; nimahsela sorkar lamin hna a pek theih tawh si loh avangin Mizo ṭhalai 'hna nei lo' an pun phah ta a ni. Hna hmu lo nia inngai tam takte hian hna nia an ngaih a dik tawk loh vang a ni thei a, kan zirna kalpui dan thleng hian hna hmu loa min siamtu a ni ve thei a, ngun zawka ennawn a ṭha khawp mai.

Mizo ṭhalaite hi a nawlpuiin an thatchhe hauh lo a, an hna thawh thiam leh thawh âwm chi kawhhmuh thiam chuan taima, themthiam leh ṭangkai tak tak ṭhahnem tak an awm. Sorkar leh thuneitu lam hian Mizo ṭhalaite hnathawh thiam chi hi chak takin zawng se, sorkar hnain a daih lo tih a chian tawh avangin state pawn leh ram dang thlenga hna zawn thiam a pawimawh tawh hle a ni.