Sorkar ram nêk leh chhuh
Environment, Forest & Climate Change department chuan Bethlehem Vengthlanga Forest Training School (FTS) complex chhungah Bethlehem Vengthlang mite'n thuneitute phalna la lo leh dan loin FTS ram chhungah kawng an laih thu leh, khawtual mite chêt dan chu an dem thu an tarlang.
EFCC tarlan danin, Bethlehem Vengthlang Local Council Chairman leh YMA Branch President ten FTS Principal hnenah lehkha pein, FTS paltlanga tennis court panna kawng awm sa zauh deuha laih tlang an tum thu leh an hmalaknaah harsatna siam lo turin a hriattir. FTS Principal erawh chuan thuneitute aṭanga phalna nei lo chuan kutthlak lo tur leh dan anga hma la turin a lo chháng a ni.
Tun hma aṭangin khawtlangin sorkar ram an chhuhsak a lo awm tawh ṭhin. Khawtlangin mipui (voter) chakna hmangin sorkar ram an nêk châng a awm a, an dil châng a awm a, an chhuhsak châng a awm bawk. Khawtlang tan sorkar ram hman duh avangin khawtlang huapa lungawi lohna lantirte pawh a lo awm tawh ṭhin.
Khawtlang leh mipuiin an nawr an nawr hi chuan sorkar thuneitu, a bikin politician-te an ném leh nge nge ṭhin a; a chhan ber pawh mipui tihlawm tum vang leh inthlana tlin loh hlauh vang a ni foin a lang.
Khawtlangin an chakna hmanga sorkar ram nêk leh an chhuh ṭhin hi khawtlang leh mipui tan thil ṭangkai atana hman ni ve tho ṭhin mah se, ram leh hnam kal zel turah thil ṭha a ni ang em tih ngaihtuah tham a ni. Hmun ṭhenkhatah chuan khawtlang hmalakna chu thil ṭha zawk a ni thei a, hmun ṭhenkhatah a ni lo thei bawk.
Ram leh mipui náwlpui tana ṭha zawk tur thil a nih pawhin, tharum hmang emaw, khawtlang chakna hmachhuan emawa sorkar ram chhuh tum mai loin, ṭha taka dil a, dan anga phalna mumal tak nei tura hmalak leh remtih tlânna anga neih tum ṭhin ni se a ṭha ber ang.
Sorkar hotu politician-te pawh an fimkhura an huaisen a ngai; tlâk hlauh luatah ram tana thil pawi tih theih a ni tih hriat a ṭha. Nakin zela ram leh hnam tana thil ṭha zawk tur ni si loa mipui tihlawm tumna vang ringawta sorkar ramte khawtlang tana pek ngawt zel hi tih loh a ṭha e.