Sumtuakna atana mihring hman

Bru misual leh National Liberation Front of Tripura (NLFT) ?angkawp nia hriatte chuan tun hnai khan Dampa ngawa Chikha leh Tuipuibari inkara BRTF hna thawk Hakum Singh leh Thangchhuaka-te an rubo a; tun hnaiah helai bawrah hian mi rukbo a tam tawh hle a ni.

Mizoram chhunga inrukbona thleng fo mai hi a thinurthlak a, a rubotute hian thil phût neih vanga ru bo pawh ni loin sum tuakna atan an hmang a ni ber ṭhin a, a pawi hle a ni. Mizoram aṭanga Tripura lama anmahni duh thu ngeia chhuak ta Bru-te, Mizorama hruai kir tumna boruak a awmlai hian heng inrukbona hi a thleng duh hle mai a, chuvangin Tripura-a tlan lut Bru-te thiltih nia rinhlehna a tisang hle a ni.

A rubotute chu tu pawh ni se Mizoram chhunga mihring an rubo fo mai hi Mizo tan pawh a tlawmthlak a, sorkar tan pawh a luhaithlak takzet ang. Tun hmain inrukbona hi a thleng tawh ṭhin a, sorkar thuneitute nen an indawr hnuah chhuah an ni ve leh mai ṭhin a, pawisaa tlan chhuah an nih leh nih loh lam chu mipui nawlpui tan hriat a ni lo a, thuneitu lam chuan tlan chhuah an nih loh thu an sawi deuh tlangpui a ni. Heti chunga inrukbona a thleng leh ṭhin hian pawisain an intlan nia rinhlelhna a siam lo thei lo a, chutiang chu a thleng a nih chuan a zialo hle a ni.

Mizoram chhung aṭanga inrukbona thleng ṭhin hi sorkar pawhin vawi tam a ngaihtuah tawh ngei ang a, hmun tinah vengtu police dah theih a ni si lo a, inven sen a harsa hle ang. Heti chung hian sorkar hian hmun ralṭi bik leh misual chet duh zualna hmun nia an hriat hi tun aia ṭha zawk hian vil se, misualte ngampatna hmun bik a awm lohna turin Police lam pawhin an tih tur ti se, theihtawp chhuah rawh se.