Tuialhthei man leh lirthei chuan man
Sorkar laipui chuan February 3, 2014 aṭang khan India ramah tuialhthei man a tihniam. Mizoramah pawh hei hi hman ṭan nghal a ni a; tuialhthei man tihhniam leh a nih chhan hi ram dang aṭanga tuialhthei thlitfim loh leina man a tlakhniam vang a ni.
Mizorama lirthei chuan man mipuiin a sang an tiin an sawisel ṭhin a, sorkarin lirthei chuan man bithliah hrang hrangte a siam a, zawm a hlawh vak ṭhin lo. Khawpuia taxi leh bus chuam mante pawh sorkar rawt ang diak diaka lâk a ni ngai meuh lo a, khaw kar kawnga maxi cab leh bus chuan mante thlengin sorkar duh angin a kal hlei-thei lo.
Lirthei neitu lamin lirthei chuan man a san chhan an sawi ziah chu petrol leh diesel man pung zel hi a ni a, an ṭanna hi a dik hle a ni. Tuialhthei man sangin lirthei chuan manah nghawng a nei ṭhin a, tun hnaiah chhan hrang hrang avangin petrol leh diesel man a tlahniam zauh zauh a, lirthei chuan manah nghawng a la nei ve lem lo. Mipui lamin petrol leh diesel man sang an chawipui ṭhin a, a man tlahniamah hlawkna an la nei ve lo niin a lang.
Engpawhnise petrol leh diesel man a hniam vanga lirthei chuan man tlahniam tura beisei hi a tak takah chuan thil theih a nih hmel lo a; nimahsela lirthei neitu lamin inenfiahna atan hmang se a ṭha khawp mai. Mahni chan lam ringawt kan thlir hi chuan kan rawngbawlsak tur mipui lam hi kan theihnghilh ṭhin a, mipui tana ṭangkai lirtheite hi mipui tana phurrit ni khawpin a chuan man a sang palh ang tih thil hlauhawm a ni.
Lirthei neitute hian eizawnna atan an hman avangin a chuan man tihsan hi chu an tum reng dawn a; nimahsela mipui rawngbawltu an ni tih hriain sorkar lamin a âwm tawk nia an chhiar chin hi chu zawm hram hram se a ṭha khawp mai.