CBI chhuitir tura dah leh pek

Mizoram Lokayukta-in an hnena zualkona thu a luh anga an buaipui lai zinga thil chi thum - ropeway leh skywalk siam chungchang, sorkar sikul tihchangtlunnaa sum tihchingpen a awm nia sawi leh Lengpui Airport chei ṭhat chungchangte chu Central Bureau of Investigation (CBI) chhuitir turin Mizorama rorel lai party chuan tun hnaiah Lokayukta an ngen. Lokayukta hian CBI a chhuitir dawn em tih hriat a la ni lo.

Ram dang aṭanga dan loa Mizorama kuhva rah tawlh chungchang pawh Gauhati High Court chuan CBI chhui turin tun hnaiah a dah bawk.

Hun eng emaw ti aṭang khan Mizoramah 'CBI' tih hi a lâr a, mipui nâwlpuiin chiang takin hre lo mah ila kan hriat dan tlanglawn tak chu, 'Hnu chhuitu ṭha leh rintlak' tih hi a ni âwm e; engtiang taka rintlak nge an nih erawh kan hre lo tlangpui.

A chunga thil chi li tarlante hi Mizoram mipuiin an sawi nasat, hmun hrang hranga mipui titi luahtu tak takte an ni hlawm a, mi tam takin thil dik lo a awm ngei nia an ngaihnate a ni. CBI chhui tura High Court-in a dah tawh leh ngenna awm tawhte hi CBI-in chhui ngei se, mipui tam zawk duh dan pawh a niin a hriat. Chuta ṭang chuan CBI nihna tak pawh chiang zawkin kan hre theiin a rinawm.

CBI hnena general consent pek leh pek lohah political party mite chu an awmna party azirin an sawi dan a inang lo. General consent pek a ni emaw, ni lo emaw, a pawimawh chu Mizorama thil dik lo hrang hrangte CBI-in ṭha taka an chhui theih a ni a; chutiang tur chuan state sorkar, agency dangte leh Lokayukta thlengin an inhawn a ṭul ang.