Zangnadawmna phût lote an fakawm

Bairabi-Sairang rel kawng siam tura Kawnpui aṭanga rel chawlhmun pa­hnih panna kawng siam tura ram nei­tute chuan, zangna­dawmna phût loa kawngpui siam an rem ti a, thuneitute hnenah an phalna hi ziakin an thehlut tawh.

Mizorama kan buaina lian tak pakhat chu zangna­dawmna beiseia thil kan kalpui nasa lutuk hi a ni. Zangnadawmna chungchangah hian political party hruaitu pawimawhte hi tun hma deuha a hmingchhe hmasa an ni tawh a, tun hnai­ah hian sorkar official zingah 'zang­nadawmna lem' anga puh theih dawng an awm nual bawk a, a pawi hle a ni.

Mizoramah hian project ṭha tak ni turte zangnadawmna fel lo taka an phût avanga pamṭûl tate pawh a awm. Tun hnaiah sokar official tute'n emaw project lian deuh a awm tih hre rengin thingtlang mi a hre lo zawkte ram tlawm tein an leisak a, chu an ram leiah chuan sorkar project lian eng emaw an bun a, zangnadawmna sum tam tak an la tih sawi tur a awm. Hei hi sorkar tan dan loa thil ti anga puh theih a ni lo mai thei a; nimahsela Mizo mit leh Kristianna mit aṭanga thlir pawhin inbumna rawngkai leh thil fel lo tak a ni.

Tunlaiah miin dik lo taka zangna­dawmna an beisei ṭhin laia Kawnpui mipuite'n an rama kal tlang tur kawng­pui laihnaa zang­nadawmna an phût lo hi an fakawm hle mai a, hei hi khaw dangte pawhin entawn se; mi thilphalte inpek-na hi a ropui a, ram hmasawnna dâl khawpa duhâmna hi i paih ang u.