Thurâwn inpek leh inhawn

Mizoram Peoples' Forum hruaitute chuan July 25, 2024 khan chief minister Lalduhoma a pisaah an kâwm a; Mizoram sorkar kal mek dan te, sorkar kal dan leh hmalaknaa an ngaihdan leh duh dante an sawipui. Chief Minister pawhin an hmalakna hrang hrangte a lo hrilh nia sawi a ni.

MPF hruaitute hian sorkar kal dana ṭha an tih te, sorkar hmalakna ṭha nia an hriatte an sawi rualin, ṭha tâwk lo nia an hriat leh inpuhmawhna hrang hrang te, fimkhur lehzuala sorkar a kal a ṭulna nia an hriatte hmaichhan ngeia Chief Minister an sawipui hi a lawmawm. MPF chêt dan hi a mawi a, thil ṭha tak a ni a, sorkar hotute'n ram an hruai zelna turah rah ṭha a chhuah ngei a beiseiawm.

Political party-te hi chuan sorkar kal danah leh hmalak danah thil dik lo emaw, thil dik lo anga puh theih thil an hriat hlek chuan nasa thei ang berin an insawisel a, an inpuhchhe nghal mai ṭhin. Hetianga chêtna hian engtiang takin nge awmzia a neih hriat a har a, awmzia a nei chiah em tih ngaihtuah tham tak a ni.

Sorkar kal dan te, hma a lak dan te, kawng hrang hranga thil a tih dan leh chêt danah fel tâwk lo te, ram leh mipui tana ṭha lo thei thil a awm a nih chuan ṭha taka inhrilh a, insawipui leh kawng inkawhhmuh hi thil ṭha tak a nih a rinawm. Chutiang zawng chuan pawl hrang hrangte hian rilru pu thei se, a ṭul angin sorkar hotute pawh sawipuiin thurâwn pe ṭhin se a ṭha. Sorkar hotute tan pawh dawnsawn a nuam ang a, bawhzui pawh a châkawm duh deuh nge nge ang.

Sorkar hotute pawh thurâwn pek theih leh dawngsawng thei tura an inhawn a, rilru zau tak an put a ṭul. Thurâwn pek theih loh, thil ṭha zawk tur mimal leh pawlte'n an sawipui pawha ngaihsak ṭhat loh leh bawhzui ṭhat duh lohte pawh thil awm thei a ni. Chutiangah chuan inbei zui zawnga hmalak zui mai pawh thil awl tak a ni ang. Sorkar hotute an inhawn ve a ngai a ni.