Aizawl Municipal Council

Aizawl Municipal Council (AMC) councillor pasarihte chuan tun hnai khan Aizawl DC hnenah AMC chairman bàn tura ngenna an thehlut a; AMC chairman-in thlawptu a neih tlem tawh zawk thu an sawi.

AMC hian a term vawi khatna a hmang mek a, chairman pahnih a nei tawh a, tunah chairman pahnihna hi bân a ni leh mai dawnin a lang. AMC kal dan en hian Mizorama Municipal Council kan neih hmasak ber hian chanchin duhawm lo tak a hnutchhiah reng tawh dawn tihna a ni a, a pawi takzet a ni.

AMC-a Coun­cillor-te hian a thlang tlingtu mipuite zah vang tal pawhin thuneihna duh vanga ṭan lam thlak sek mai hi titawp thei se a ṭha khawp mai a, tuna a lan dan hi chuan Councillor zawng zawngte hi a rorel (ruling) lamah an ṭang hman vek dawn a nih hmel. AMC inthlan dawna an dinnaah khan ding tlang ṭheuh ni se tun anga thil kal buai hi a awm lo tur a ni a; nimahsela Councillor ṭhenkhatin an ṭan lam an thlak takah chuan a lehlamin ṭan an la lêt ve a, tun hi kan thleng ta a ni.

Councillor mi zahawm tak takte pawh an khawsak danin a zir tawh loh avangin an zahawmna a tlahniam lo thei lo a, AMC hmai hi a bâl a nih chuan tute tihbalh mah ni loin a enkawltu a Councillor-te vang a ni ngei ang.

Tunah chuan thil a kal thui tawh a, Chairman ban turin thuneitu lamah thlen a ni tawh a, Chairman-in thlawp­tu a neih zat an bûk hnuah AMC hian Councillor thar a nei leh dawn pawh a ni mai thei. AMC-a thil thil thleng tawh zawng zawngte hi an enkawl Aizawl mipuite hian an helh hle ang tih chu thil chiang sa a ni a, thuneihna duh vanga a thlang tlingtu mipuite'n an thlan tlin tirha an hawi lam an thlak zeng zung hi chu thil pawi tak a ni.

AMC term hmasa bera thil thleng hi inzirna atan hman ni se, a thlang tlingtu mipuite zah vang tal pawhin tun hnuah AMC-ah hetiang hi thleng nawn tawh suh se.