Kangmei

Statistical Handbook of Mizoram-in a tarlan danin kum 2013-2014 chhung khan Mizoramah kangmei vanga thi mi pali an awm a, mi pariatin hliam an tuar a, kangmei chhuak ṭum 472 a awm.

Mizoramah hian ṭhal laiin kum tin mai kangmei a chhuak ṭhin a, mihring nunna chânte pawh an awm hial ṭhin. Kangmei chhuah dan hi a inang lo hlawm a, lo hâl avanga ram kang a awm ṭhin a, lo hâl vanga in leh thlam kangte pawh a awm. Khaw chhunga kangmei chhuak tam berah hi chuan electric kal sual hi puh a ni ṭhin a, hei hi kangmei chhuah chhan a ni ngei em, tih erawh finfiah a harsa tawh ṭhin.

Kangmei laka inven dan hi thil harsa tak a nih rualin thil awlsam tak a nih dan pawh a awm a, in chhungah chuan electric connection dan ang thlapa neih leh mombati leh khawvar chhit nikhuain mutsan leh chhuahsan dawna tihhlum hi inven dan awlsam tak a ni a; meizial zi mite'n an meizial bung an paih mai mai loh a pawimawh bawk. Ram lamah chuan lo hal turin mei lam an sial a, lo hallaia ram kang tur venga taima taka thawhchhuah hi kangmei chhuak tur ven dan ṭha tak chu a ni.

Heti chung hian inven hman loh, vanduai vanga kangmei chhuak hi a awm leh ṭhin a, hei tak hi mitin kan fimkhur a ṭulna chu a ni. 'Kangmei lakah i fimkhur ang u,' tia thuneitu lamin ṭhahnemngai taka an sawi a, thuchhuahte an siamlai hian mahni hi chu kang ve thei lo, khawi hmunah emaw thleng tur anga ngaihna hi mi tinin kan nei. Hei vang hian kangmei chhuak tur laka inven kan sawi hian tute emaw tih turah kan dah duh khawp mai.

Kangmei chhuak thei laka inven hi mi tin mawhphurhna a ni a, kan chhiattawhna avanga midangte chhiattawhna thlen theitu a nih lehzel avang hian kan fimkhur tlan a ngai takzet a ni.