Remna siamtu nih a chhuanawm

MNF president Zoramthanga chuan, Central-a NDA sorkarin Zohnahthlak hel pawlte chu remna siampui ngei a tum tih a sawi a; February 5-7, 2015 chhunga Shillong-a a zinnaah Manipur-a Zohnahthlak hel pawl hrang hrang intêlkhawm United People Front (UPF)-te’n India sorkar nen inbiak remna an neih theihna kawng dappui tura an sawm angin a tel tih a sawi.

Tun hnaiah Mizo­ram chief minister hlui leh MNF president Zoramthanga hi Myanmar-ah remna palai hna thawkin a zin chhuak a, tun hnaiah vek India hmarchhaka Zohnah­thlak hel pawl hrang hrangte'n rem­na siam kawnga ṭan­puitu atan an sawm thu a sawi leh bawk a, hei hi thil lawmawm tak a ni. Zoramthanga'n remna palai hna a thawk thei a nih chuan Mizo zawng zawng tan lawmpui tur chi a nih hmel a, politics thila lâka party dangin lo helh vak tur niin a lang lo a, chutiang bawkin a thawhpui party tan pawh politics-a hlawkna neihpui tum vak chi pawh a nih hmel chuang lo.

Remna hlutzia hre chiangtu chu Mizo mipuite kan ni a, ram buai avanga kan tawrhna nasatzia hre phakte chuan tuna Mizorama remna lo awm ta lawmawmzia hi an hrethiam chiang bik a ni. Tuna ṭhangtharte hi chuan buai hrehawmzia an hre tawh lo a, remna kan neihte pawh hi a tur rengah an ngai mai ang tih a hlauhawm a, remna a thlen theihna tura inpete chhuanawmzia hi an hriat thar a pawimawh khawp mai. Mizorama buai a reh theihna tura tha thawhtu kohhran, tlawmngai pawl, political party-te leh remna duha lo kir zawng zawngte an fakawm takzet a ni.

Mizorama chengte hi kan chhehvela Mizo hnahthlak awm­te tan kan pawimawh a, kawng hrang hrangin heng kan unaute hian min mamawh hle. Politics vang emaw, hnam leh sakhua vangin emaw hel pawl hrang hrang a ding thei a, heng hel pawlte tana remna kawng siama kawhhmuh theituah Mizoram chhunga Mizote min duh a nih chuan phûr taka thawhchhuah a, remna siam tura ke pen hi kan tih tur dik tak a ni e.