AMC boruak leh a nghawng

Aizawl Municipal Council (AMC) sorkar, chairman Zar­zoliana kaihhruai chu paihthlak a ni a; chairman thar CT Zakhuma kaihhruai AMC sorkar thar a piang dawn.

AMC boruak hian Mizoram politics kal dan chiang takin a tilang a tih theih a, lal duh vanga awm hmun nghet pawh nei hleithei lo leh thawhpui duh bik leh hreh bik pawh nei lo khawpin poli­tical party-te an awm tlang ta a ni ber mai. Hetihlai hian hei hi party politics kalphung a ni ve pakhat a, Mizoram pawnahte hian sor­karna siam tuma inpawh khawm hi a tam a, thil thar a ni lo.

Politics hi thil­titheitu dinhmuna din tuma intihsiakna a ni ber a, lal tuma ṭan la vek an ni a; nimahsela a pawimawh ber chu lalna leh thuneihna neih an tum dan hi a ni. Lal duh luat avanga tute emaw chhiat hlenna tur thlenga inbeihte, lal duh avanga mahni political party awmna ngei phatsante leh a thlangtu mipui duh dan kalha khawsak theih tak mai a ni a, hemi kawngah hian AMC-a councillor-te hi an inenlêt a ṭha khawp mai.

Politics huang chhunga awm an nih avangin thil tam tak hi a thiang taah an ngai a ni mai thei a; amaherawhchu politics a nih tak avanga thil tihâwm leh âwm lo thliar thei lo khawpa an awm ta a nih chuan a fel hauh lo ang. Tuna thil thleng hi darthlangah hmang ila, insiamṭhat phahnaa kan hmang thei a nih chuan a lawmawm hle ang. Chutiang ni loa AMC lo kal zel tura tihhmuhtu ang lek an nih chuan a pawi lehzual dawn a ni.

AMC councillor-te'n lalna an ûm avanga term khat chhunga an kal kual dan en hian AMC lo kal leh zel tur hian lalna hi an âtchilh mai tih pawh a hlauhawm ta hial a; nimahsela thil tihsual hi inzirna atana hman chuan ṭangkai takah a chhuak thei a, hei hian AMC kal zel turah nghawng ṭha lo lam nei lo se a duhawm hle.