Hriselna ngaih pawimawh a ṭul

Mizoram sorkarin Mizote phaia an inenkawlna atana damdawi-in a thlante zinga mi Medica Superspeciality Hospital, Kolkata hotute chuan July 26, 2024-a Aizawl Press Club-ah thuthar thehdarhtute an kâwmnaah, an damdawi-inah Mizo 2,000 vel an enkawl tawh thu an sawi.

Medica Hospital hi kum 2010-ah din a ni a, an din tirh aṭangin chawhrualin kum tin Mizo damlo 140 chuang zel enkawl ang an ni. Anni bakah hian Kolkata, Delhi, Mumbai leh khawpui dangahte Medica Hospital tluka Mizo damlo enkawl tam tura ngaih damdawi-in a awm nual bawk.

Mizoram páwna damdawi-in hrang hrangah Mizo damlo inenkawl zat an tam hle ang tih a hriat theih a; chu'ng damlote tana Mizoram sorkarin sum a sen leh mimal sum sên a tam turzia a ngaihtuah thiam theih àwm e.

Mizote hi hnam hrisel tak tia sawi chi kan ni lo mai thei, a chhan chu - mihring awm zat aṭanga chhûtin cancer vei tamna ber state, HIV/AIDS hluarna ber state kan ni a, natna dang ṭhenkhatah pawh India rama dinhmun ṭha lo pawl kan ni.

Mizo zingah inkai chhâwn theih loh - non communicable disease (NCD) a hluar sâwt viaua sawi a ni a, thih thut thutna hriat tur a tam tial tial. NCD-te hi nun dan phung ṭha tawk loin a thlente a ni hlawm.

Kan nun dan a awlsam tial tial a, taksa kan tiche tlem a, a hahdam tial tial a; mahni khua/veng chhungah pawh tawi tê kal dawn pawha lirthei chelek zel ṭhin an tam tawh. Hengte hi hriselna atana pawi thei a ni a, kan fimkhur tlàn zel a ṭul.

Mizote'n hriselna kan ngaih pawimawh thar a ngai a, hriselna dinhmun hre tura inenfiah kan uar a ṭul. Kum khatah vawi khat tal mumal taka hrisel dinhmun enfiah ṭhin a, test chi hrang hrang tih ṭhin a ṭha. sorkar damdawi-inah sum sen tam lutuk loin a tih theih a, sum nei deuh tan chuan private-ah a awlsam zual.

Inenfiahna atan sum sên hreh loh tur a ni a, natna hriat chhuah har vanga tlai leh sum tam tak sên pumpelh theihna a ni thei. Hun hman ve deuh a ngaih pawhin hun insiam ve mai tur a ni.