Venhim ngai mipuite

Tun hnaiah Mizoram hmar lam khaw ṭhenkhatah hel pawlte'n khawlaiah silai an hmet puak a, mipui hnenah pawisa an khawn bawk. MNF party chuan thuchhuah siamin, Mizoram hmar tlangdunga thil thlengah hian sorkar chu ṭawngka chauh ni lo, a tak taka mipuite himna tura thawk turin an phût.

Hmar tlangdunga thil thleng hi a pawiin a demawm hle mai a, mipui tiralkhel tura khaw chhunga silai hmeh puah hian nunau a tichiaiin khaw pumin a tibuai hle ang tih a chiang. Hetiang thil hi thleng nawn tawh lo se a ṭha a, hel pawlte pawhin mipui rikrap zawng khera thil tih hi chu bansan zui se a ṭha khawp mai.

Hetihlai hian Mizoram police chhuanawm tak tak ni ṭhinte hi an che muang deuh niin a lang a, an awmna hmun aṭanga silai hmeh puahna hmun an pan chhung kha a rei hle niin an sawi. Hei hi thil dik a nih ngai chuan, mipuiin an mamawh hun takah police-te hi an che muang a, mipui thlamuan tura an kal dawn khan an ṭuan a ṭha tawk lo tihna a ni a, an inenfiah a ṭha hle ang.

Police-te ṭangkaizia hre chiang bertu chu hmun ralṭia awm mipuite an ni ṭhin a, tun hnaia thil thlengah hi chuan police-te'n an tih tur an tirang tawk lo niin a lang a, hei hi thuneitu lam pawhin ngawih bopui lo se a ṭha khawp mai. Police an awm hi chuan mipui thla a muang ṭhin a, khawi hmunah pawh an awm theih loh avangin mamawhna hmun hi chu rang takin pan zung zung ṭhin se a duhawm hle.

Mipuite hi ven­him ngai an ni a, a venghim theitu chu police-te an ni. Police-te hian vawi tam tak Mizoram mipuite hi an thlamuan tawh ṭhin a, tunah pawh hmun ralṭi bika awmte chuan anni lo chu belh tur an nei lo. Police-te hi an venhim tur mipuite ban phakah awmin ṭan la thar se, mipuiin anni lo chu belh tur an neih chuan loh avangin Police mamawhna a sang hle a ni.