A ngaihna hriat a ṭul

Customs department hotute chuan Mizoram police aṭangin December 14, 2015 zana Aizawl dáia rangkachak phurtu suam kaihhnawiha a rangkachak bo chhui tura ngenna an dawn tawh thu an sawi a; nimahsela chhui vak theih an neih loh thu an hriattir tawh.

Rangkachak phurtu suam chungchangah hian Mizoram police chuan thubuai ziak lutin an chhui a, anni lam hi chuan a rangkachak lam aiin a insuamna hi an ngaimawh zawk thu leh chu lam hawi chu an chhui tur a nih zawk thu an sawi. Rangkachak bo nia sawi hi chu Custom lam chan a nih vangin Custom lamah chhui zui tura ngenna ziakin an thlen tawh. Custom lam chuan rangkachak bo nia sawi hi a thu mai a ni a, a tak hmuh tur a awm si lo a, chhui zui vak ngaihna an hriat loh thuin an chhang let.

Heng thil kal danah hian Mizoram police lam emaw, Custom lam emaw hi dem tur an awmin a lang lo a, an hnain a ken tel anga an chhui theih chinah an chiang a ni. Hetihlai hian helai hmunah hian insuamna a thleng ngei niin a lang a, rangkachak hi a bo ngei niin a lang a, a tibotua inchhal an awm a, sipai an mante pawhin rangkachak hi motor aṭanga an lak chhuah thu hi an sawi ṭheuh niin an sawi bawk.

Hetia a lan dan hi chuan, he thu hi court-ah chai a ni tawh a, CBI-te pawh hriattir an ni tawh. An chhui zui zel ang a, a rang-kachak bera hi chu an hmu tawh dawn lo a ang khawp mai a, Custom lamin 'tihngaihna an hriat loh' miau chuan a hrilhhaithlak khawp mai.

Mizoram police an ni emaw, Custom an ni emaw, CBI pawh ni se dana inziak ang kilh kelh leh tih theih leh theih loh china thil rek bung mai lo hian, he thila a bul inṭanna a rangkachak kalkawng zel hi chhui chhuah theih ni se, insuamna leh thil thleng dang a demawm tluk zet hian rangka-chak bo nia sawi chhui zui loha thamral thei dinhmuna ding hi a ngaimawhawm hle a ni.