Mimal thila khawtlang tihbuai

Sorkar chuan thuchhuah siamin, February 16 aṭangin Rangvamual leimin paih hna thawh a nih dawn avangin NH-54 chu zing dar 6 leh tlai dar 6 chhungin khâr a ni dawn a, kawng khâr chhung hian MMV leh a hnuai lamte chu Sakawrtuichhun-Lungverh kawnga tlân theih a ni ang.

Helai leimin hian mi tam tak tan harsatna a thlen tawh a, harsatna lian zawk a la thlen leh palh ang tih pawh hlauhawm tak a ni. Lei min avang hian lirthei tam tak an tangkhang tawh a, kawng hla leh chhe zawkah mi tam takin an hêl tawh a, thlawhtheihnaa zin tur nang hman lo tam tak an awm tawh a, hun leh sum tam tak sen thlawn a nih phah tawh a, a pawi takzet a ni.

Lei laitute hian hetiang thil hi a thleng dawn tih hria se an lai kher loin a rinawm a, an hriat lawk bik loh vanduainain a tlanbuak avangin he thil hi a thleng ta a ni. A laitute hi a hrehawm ti ber an nih a rinawm a, anmahni avangin mi tam takin harsatna an tawk a, tunah phei chuan national highway meuh khar lailawk a ngaih phah dawn a, an vanduai hle a ni.

He vanduaina thil thleng hi inzirna atan hmang ila, kan hnathawhna hi vantlang tana hnawk a ni palh thei em, tihte hi kan ngaihtuah a ṭha a; hmun ṭhenkhatah chuan vanduaina thlen vang pawh ni loin lei vung paih loa kawngpuia rei tak hnutchhiahte leh in sakna tur hmanrua kawngpui tihnawk khawpa dahte hmuh tur a awm ṭhin. Hei bakah hian metal road tihmelhem zawnga hnathawh hmuh tur hmun tam takah a awm a, hengte hi kan sim a ngai a, sorkar pawhin khauh zawka thil a tih ngam a ṭha khawp mai.

Mimal thiltih avanga khawtlang tihbuai hi loh theih loh chinah chuan pumpelh hram a ṭha a, a vengtu leh enkawltu lam an inthlahdah remchanga laa kawngpui tichêp zawnga hnathawh, lei laih, in sak leh eng thil tih pawh hi pumpelh i tum ang u.