Mipui mamawh khawih chingpen ven a ngai

Food, Civil Supply & Consumer Affairs (FCSCA) minister chuan, Mualkhang Gas Bottling Plant aṭanga gas bûr phur ṭhin truck-te chu Aizawl dái thleng veng (escort) turin Legal Metrology hotute a hriattir.

Tunlaiin ei-rawng-bawlna gas tihchingpenna hmunte Central YMA lamin an luh chhuah a, Mizorama kan gas hman tam tak hi a buk a tling lo a, tute'n emaw sum siamna remchangah hmangin an tichingpen ṭhin tih hailan a ni. Mizo-ramah hian gas buk tling lo tih hi hriat ni ṭhin mah se, a titute man chhuaha hrem an nih hriat a ni ngai meuh lo a, a buk tling lo phurtu driver-te pawisa chawitir ringawt lo deuha kalpui a hun tawh hle.

Gas phurtu truck ven a ngai ta hial mai hi a zialo hle mai a, chutih rualin ven ngai khawpa an khawih chingpen ṭhin avangin thil ṭul tak chu a ni. Hemi tluk zeta pawimawh chu petrol leh diesel pawlh dal tur ven hi a ni. Mizoram tluka petrol dalna hi a awm lo ang an ti hial a, Assam aṭanga phurh luh Mizoram chhunga a dal ta em em mai hi chu ven theih ni se a ṭha ngawt mai.

Mizoram sorkar hian thapui thawhin petrol tihchingpen hi ven tum tak tak se thil theih loh a ni lo a, petrol leh dielsel phurtu driver-te driver dangte aia an hausa chak ringawt te hi a fuh lo takzet a ni. Heng mite hian sum an siam a ni mai lo a, Mizorama lirtheite an tichhia a, a nghawng hi a na hle a ni.

Sorkar hian mi-pui mamawh tih-chingpenna lian tham tak hi uluk zawkin veng se, eirawngbawlna gas an veng tur hi a lawmawm a; hei aia pawimawh zawk hial nia lang chu petrol leh dielsel tihchingpen tur ven hi a ni a, FCSCA mi leh sa an indaih loh pawhin heti zat hi police kan nei a, kan oil phurtu lirthei tlem te hi chu an veng thei lo em ni?

Sorkar hian thil tam tak ngaihtuah tur nei mah se, mipui khawih bik thil hi chu ngaih pawimawh bikah nei se. Eirawng-bawlna gas khawih chingpen pawh Mualkhang leh Aizawl inkara thil thleng mai a ni chungin an man hleithei lo a, an man chhun an hrem dan pawh pawisa chawitir tih vel a ni. Petrol leh diesel pawlh dal phei chu ngaiah nei tawhin he thil dik lo hi a ngaimawh ta lo hial emaw tih tur a ni a, Mizoram sorkar hian Mizorama oil phurh luhte hi a thianghlim theihna turin theihtawp chhuahin ṭan la rawh se.