Kaziranga National Park hawng dawn

MEDMOC leh Mizoram University Incubation Centre-te hun buatsaiha thusawitu Mizoram chief minister chuan, eizawnnaah sorkar hna ngawtin ṭhalaite a tlin dawn loh thu a sawi a; entrepreneurship tihhmasawn chu thil pawimawh tak a nih thu a sawi bawk. 

Mizo ṭhalai zingah sorkar hnaa innghat lo ngam, mahni kut-kea din tum ngam ṭhahnem tak an awm chho zel a, tun hnaiah mahnia eizawn tuma entrepreneurship lama theihtawp chhuaha ṭan la an pung zel a, thil lawmawm tak a ni. Hetihlai hian ṭhalai tam zawk hi chuan sorkar hna an hmuh hma chu 'hna hmu lo' anga inngaiin sorkar hna an la zawng zel a, sorkar hna erawh awlsam taka hmuh a harsa chho zel. 

Sorkar hna latu Mizoram Public Service Commission (MPSC) chu sorkarin 'chhawk zangkhaiin' Mizoram Subordinate Services Selection Board (MSSSB) a din a, anni pawh hian an hna an ṭan chho mek zel. Ngun taka chhut ngai erawh chu MSSB awm hnu hian MPSC hna hi a chak ta sawt nge chak sawt lo, tih hi a ni ang a; hei bakah hian MSSSB hna lak dan kalphung leh an hnathawh hian MPSC mal kal lai a tluk nge tluk lo, tih hi a ni ang. 

Ṭhalaite'n sorkar hna an duhzia leh an mamawhzia en hi chuan, a hna lakna lama kan kalphung ṭhenkhat hi chu ennawn deuh a ṭha ngawt mai. Sorkar sikula zirtirtu laknaa 'iptepui banna' an nih vanga duhsak tura an ziahsak duh maite leh, an bial mi a nih avanga tling ngei tura dilpuina leh an thawhna (post) tur nen lama rawtna kan ram hruaitute'n an la ziak duh tlat maite kha a vanduaithlak takzet a ni. 

Sorkar hnain ṭhalaite a daih vek dawn lo tih a chiang tawh a, hetihlai hian mahni kutkea an din theihna tur lamah hian sorkarin sum engzat nge a dah? Mizoram Youth Commission hi hnathawk tak tak thei tura din a ni em? LESD & ED lam hi thuam chak tumna a awm em? Kan state sum hlawm vawm khawmna SEDP lamah hian entrepreneurship lam hawiin cheng engzat nge dah a nih? Heng zawhna hrang hrangte hi kan budget bu keu chunga chhan tum ila, sorkarin ṭhalaite eizawnna a ngai pawimawh tak tak nge tak tak lo tih kan hmu thei ang. 

Tuna kan ram dinhmun thlir hian, Covid-19 avang pawhin ṭhalai eizawnna nei lo hi an pun belh zel si a, sorkar hna diltu an pung lo thei lo a; sorkar hna ni lo thawk tura kan kawhhmuh ṭhalaite hnathawh dan tur hi ngaihtuahpui an ngai ta takzet a, sorkar hna awm chhun ang angte pawh ṭhalai zinga a tling leh thiamte'n an thawh ngei theihna turin dik taka hna lak ni ṭhin tawh rawh se.