Home Minister thusawi

Home minister R Lalzirliana chuan, tun hnaia NLFT-te'n Mizoram aṭanga mi pahnih an rûkbo chhanchhuak turin Bangladesh-ah Mizoram police-te tirh luh an tum hman tih tun hnaiah a sawi a; inrûkbona a thlen ṭumin Bangladesh-a luh phalna sorkar laipuiah an dil tawh tih a sawi bakah NLFT bûk luhchhuah an tum hman thute a sawi.

Home Minister hian Mizoram mi­puite thlamuan a tumna lama a sawi a nih hmel a, a thu­sawi hi mipuite'n an thlamuanpui viau mai thei a; nimah­sela Home Minister thusawi hian ngaih­tuah a tithui hle a ni.

Mizoram sorkar hian inrukbona thleng ṭhin a duh lo takzet a ni tih a sawi tumna a ni mai thei a, an thil tih 'tum' thleng thlenga vantlang hmaa sawi hi chu thil ṭul ber a ni lo thei a, thup chin neih thiam hi a ṭha khawp mai.

Kan ṭhenawm state-a NLFT-te'n kan ram chhunga mi ngei an ruk bo ṭhin avangin sorkar pawh a lungawi lo a, a ṭul a nih phawt chuan Bangladesh thlenga ûm mai an inhuam tawh a, thuneitu lam pawh an lo be diam tawh a nih hmel a, thil lawmawm tak a ni. Hetihlai hian kan state chhung ngeiah pawh hel pawlte chetna sawi tur a awm leh zauh ṭhin a, ramriah ngei pawh buaina kan tawk fo ṭhin a, heng thilahte pawh hian sorkar hian a mipuite thlamuan turin ṭan la zel se a ṭha khawp mai.

Home Minister berin NLFT tawmna bûk luhchhuah tuma an inrin hman thu leh, Pathian an rawn hnua an ṭhulh leh tak thu a sawite hi chu Police department chhungah tawp mai se a ṭha hle mai a, vantlang hriata sawi kher ṭul lo hi a awm ve a, he mi kawngah hian sorkar hotu pawimawh chin hi chu an insum thiam a ṭha hle a ni.

Engpawhnise Home Minister-in Mizo mipuite thlamuanna thu a sawi hi thil lawmawm a ni a, a duhthawh luatah a sawi chipchiar lutuk deuh a nih hmel a, sorkar hotu pawimawh chin hi chuan zêp chin tur leh sawi tur âwm chin an thliar thiam zel hi a la pawimawh khawp mai.