RRF ṭhiah leh a behbâwm

Mizorama lui humhalhna atana siam Riverine Reserved Forest (RRF) notification ṭhiahna thupek Gauhati High Court-in a lo chhuah tawh chu India rama court sang ber Supreme Court chuan July 24, 2024 khan a hnâwl.

Kum 1965-a chhuah tawh RRF notification chungchangah court-a zualko an awm avangin Gauhati High Court chuan January 27, 2021 khan a paih a, Tuirial Hydel Project kaihhnawihah zangnadawmna diltute hnenah zangnadawmna pek turin a ti nghal bawk. Mahse, High Court order chu mi pangain Supreme Court-ah an khing ve leh a, Supreme Court chuan Gauhati High Court order chu a paihsak ta a ni.

High Court-in ram humhalhna RRF notification a paih khan Mizoram sorkarin High Court-ah vêk writ petition thehluhin a khing lêt mah se, a hnu lawkah a sût leh. Mizoram sorkar hi sorkar notification humhalh tlat tur leh Mizoram lui hrang hrang kam vel humhalha theihtawp chhuah tur a ni laia writ petition a hnûk lêt leh daih kha a mak viau.

Mahse, leilung leh a chhunga awmte leh lui dung humhalh duhtu mi ṭhahnemngaite'n hma an la a, Supreme Court-ah an zualko a; an hmalakna kal zelah Supreme Court-in order thar a chhuah hi a lawmawm.

Mizoram khawi hmun pawh hi humhalh leh venhim ngai vek a ni a, leilung leh a chhunga awm zawng zawng hi humhalh ngai a ni. Humhalh turin sorkarin theihtawp a chhuah tur a ni a, pawlte leh mipui pawhin mahni theihna zâwnah ṭan kan la ṭheuh tur a ni ang.

Leilung leh a chhunga awmte humhalh hi kan tih tur a nih rual hian, ram leh hnam hmasawn zelna tur ngaihtuah tel a ngai. Ram leh a chhunga cheng mipui hmasawnna tur dâl tlat khawpa chêt uchuak erawh a ṭha ber kher lo ang.

Ram hmasawnna hna thawk a, mihringte hmasawnna, changkanna leh nun nuam zawk neihna atana hmalaknaah hian leilung, thing leh mau, mihring leh nungchate'n an tawrh a ngaihna chin a awm. Ram leh hnam, mipui tana ṭha ber tur ngaihtuah a, inbûk tâwk taka thil kalpui a ṭul âwm e.