Bru buaina a tawp hnai tawh em?

Union Home minister Rajnath Singh chuan tun hnai khan Kanchanpur, Tripura a tlawh a, Mizoram aṭanga tlan chhia Bru-te dinhmun a en. Mizoram Bru Displaced People's Forum chuan Rajnath Singh-a hnenah hian, Mizorama awm lo chunga Mizoram khua leh tui nih ngenna an thehlut.

Bru buainaah hian Mizorama Mizote hian ngaihdan fel tak an nei sa tawh a, tuna Tripura refugee camp-a awm Bru-te hi anmahni duh thu ngeia tlanchhia an ni a, sorkar laipui ruahman anga state sorkarin koh kir a tum pawhin an duh lo a, harsatna an siam zel. Sorkar laipuiah an theih ang tawkin an zualko a, media kaltlangin an harsatnate uar takin an puangzar a, sorkar laipuiin a ngaihven theihna turin tih hreh an nei lo a ni ber - hei hi Mizorama Mizote'n Bru raltlante chungchanga an ngaihdan tlanglawn a ni.

Hetihlai hian sorkar laipui hmuh dan nia lang chu Bru raltlante hi tun thlengin Mizo­ramah an la kir ngam lo a, Mizote'n an tihṭhaih nasat avangin an tan haw ngam a ni lo. Tripura-ah refugee anga an awm hi Bru tan a him ber a, sorkar laipuiin a châwm mai loh chuan rilṭamin an awm dawn, tih a nih hmel.

Bru raltlante kan hmuh dan hi a inang lo takzet a, sorkar laipui hi chuan hawna tur nei lo leh haw ngam lo hmuhin an hmu a; Mizo mipuite hi chuan Mizorama kir thei reng, hamṭhatna beisei avanga refugee anga a rei thei ang ber awm luih tum hmuhin an hmu ve thung ang.

Congress sor­kar laiin Union Home Minister kha Mizorama Mizote aia Bru raltlante vei zawk nia puh theih turin an awm tawh a; BJP hnuaiah pawh Union Home Minister-in Mizorama Mizote aiin Bru raltlante hi a ngaihsak zawk a ang hle. Hetiang zela thil a kal chuan Bru vanga kan buaina hi a reh lawk lo ang tih a hlauhawm a, sorkar laipui hian Bru raltlante harsatna ngaihvena a hmuna kala a biak rual hian, Mizorama Mizote hi Bru raltlante awm dana an ngaihdante pawh zawtin ngaihven ṭhin rawh se.