Revenue department hna tihchak

Land Revenue & Settlement Minister chuan rang zawka ram pass siam a nih theih nan department páwn lam mi rawih tum a ni a, empanelled firm turte pawh tihfel tawh a nih thu a sawi. Mizoramah ram buai leh LSC inthuah a tam thu leh, chu chu mipui leh sorkar (Revenue department) thiam loh leh chak loh vang a nih thu a sawi bawk.

Revenue Minister hian chak zawka hna an thawh theih nan te, rang zawka ram pass tihfel a nih theih nante ṭan an la leh kawng hrang hranga hma an lak thu a sawi hi a lawmawm a; ṭan an laknate hi hlawhtling ngei a, sorkar leh mipuiin a hlâwkna tél ngei se a duhawm.

Tuna a lan danah chuan Revenue department-ah thawktu an indaih lo a, surveyor a indaih lo em em. Ram chinfel ngai hrang hrangte tifel turin hun rei tak tak nghah a ngai ṭhin a, mipuiin harsatna an tâwk nasa. Mipui harsatna sutkianna atana surveyor-te puitu tur, ram teh leh map drawing ti tura department pawn lam mi rawih a nih chuan harsatna tam tak a chhâwk zângkhai ngei a rinawm. An thawh tam dan azira hlawh hmu tur an nih hmel a, chu chu mipui tan hlâwkna a ni thei ang.

Titi-ah chuan surveyor-te hi pawisa peka koh kal an ngai ṭhina sawite a awm ṭhin a, ram teh hma duh chuan pawisa pek a ngaih thute sawi a awm ṭhin. Hei hi a dik a nih chuan tun hnuah chuan awm tawh lo se, a awm tawh loh nan thuneitute'n khauh takin inthununna (discipline) an kenkawh a ṭul.

Mizoram, a bikin Aizawl huam chhungah ram buai, LSC/pass inthuah a tama sawi a ni a, a zialo hle. Ram buaite leh LSC inthuahte chu chinfel theih ni se a ṭha hle mai a, sorkarin huaisen taka hma a lak a ngai a, minister leh Revenue-a thawktute an dik hmasak a ṭul àwm e.