Phun sa enkawl

Horticulture minister PC Lalthanliana chuan a depart­ment-a hnathawktute fuihin, "Thei leh thlai tam tak chingin kan phun belh zel bawk lai hian a bikin serah phei hi chuan phun belh aiin phun sa enkawl ngun hi kan hlawk zawk ang em tih ngaihtuah a ṭul a ni. Mizote hian kan thlai leh thei phun reng reng hi a enkawlna kawngah kan in thlahdah a, a hun taka lei ṭha pekte kan ngaih pawimawh a

ṭul," a ti.

Mizoramah hian thei leh thlai ṭha duh lo a awm loh thu hi kan sawi nasa a, a dik pawh a dik. Hetih rual hian thei leh thlaia intodelh kawngah hian kan la hnufual hle mai a, thei leh thlai ṭhat duhna ram nih nen chuan thil inhmeh lo tak a ni. Mizo zingah thei leh thlai dang 'a hlawk' tia an sawi avanga ching/ phun ve mai, enkawl zui lem lo kan tam hi a pawi khawp mai.

Kuthnathawktu taima tak takte hi remhria leh fing an ni vek kher lo a, an thei leh thlai phunte ngei pawh a enkawl zui dan an thiam tawk lo. Hei tak hi sorkar hian chonaah ngai se, mithiam a neihte pawh office dawhkana hnathawh duhtawk mai loin, a tam thei ang ber kuthnathawktute huan leh lo thleng ṭhin se, a thiamin an enpui na na na chuan kan thei leh thlaite pawh tun aiin a puitling ṭha zawk ngei ang.

Loneitute hi mi taia tak tak an ni hlawm a; nimahsela kaihhruai ngai tak tak an ni a, thei leh thlai enkawl zui tura kaihhruai ngai takte an ni. Anni hian an thei phunte hi a phunah a tawp mai lo tih hre chiangin tun aia uluk zawkin ngaihven zui se, sorkar mithiamte'n a tam thei ang ber a hmunah kal chilhin a enkawl dan kawng kawhhmuh bawk se, tun aiin thei leh thlaiah kan intodelh thei zawkin a rinawm.