Sikul ṭan hma a ni dawn ta
Coincil of Ministers ṭhukhawm chuan Mizorama sikul kai hun sawn hma rawtna a pawm a, academic session thar aṭangin zing dar 8:00-ah sikul ṭan a ni tawh ang.
Sikul kai hun sawn hma tum rawtna a awm aṭangin inhnialna a tam hle mai a, sikul kai hma ṭha titu lamin a ṭhatzia sawi tur tam tak an nei a, a ṭha ti lo lamin ṭan chhan ṭha tak tak an nei bawk. Tunah chuan sorkar berin sikul kai hun zing dar 8:00-ah a titlu ta a, inbuatsaih ṭan a hun ta a ni.
India rama state tam zawk hi Mizoram aia thlang zawka awm an ni a, ni a chhuak tlai zawk. Heng state tam zawkah hian Mizoram aiin sikul an ṭan hma vek a, zing dar 7:30 bawr vela sikul kai ṭan hi ṭhahnem tak an awm. Anni pawh an inpeih hman a nih chuan Mizorama sikul naupangte pawh hi zing dar 8:00-a sikul ṭan turin an inpeih hman a rinawm a, kan nunphung erawh tlema kan thlak hret chu a ṭul mai thei e.
Sorkarin sikul kai hun a sawn hma dawn ta a, naupangte pawhin tlai lamah hun thawl an ngah dawn. Hei hi a ṭangkai thei ang bera hman tum ni se, khawpui leh thingtlangah mahni tlin tawka naupangte tih tur siam thiam a pawimawh dawn a; hausak leh retheih kar a nihna chen pawh awm bawk mah se nu leh pain an fate an ngaihsak tak tak a nih chuan an sikul bana an awm dan/ tih tur hi chu an rel fel sak thiam ngei tur a ni ang.
Sikul ṭan hma hi a tirah chuan kan thiam loin a harsa kan ti deuh mai thei a; nimahsela state dang zawng pawhin an tih theih hi Mizoram a nih vanga kan theih lohna tur a awm lo a, a harsatna lam ringawt en lo hian, sikul kai hma kan ṭhatpuina lam tur hi i thlir tawh zawk ang u.