VIP quota
Chief minister Lal Thanhawla hoa Council of Ministers ṭhukhawm chuan, VIP ten buhfai leh chini an dawn ṭhin tihtawp an rel.
VIP-te'n buhfai leh chini an dawn ṭhin tihtawp a ni ta hi thil lawmawm lam chu a ni phawt ang a, kha leh chen quota an lo nei reng erawh mipui tan thik tham a tling awm e. VIP-te hian chim buaitu an ngah hle mai a, thingtlang lama MLA-te phei chuan mikhual an thleng reng a, an khawsak a hautak a, ei leh ina an senral ringawt pawh a tam tham hle. Heng vangte hian VIP-in buhfai leh chinia quota an dawng hi a âwm ti pawl an awm ngei ang.
MLA hlawh tihsan a nih dawna MLA an ṭang rual ṭhup mai khan an khawsak a hautak hle tih hi a tichiang a, chutih rualin an tana hlawkna turah chuan eptu pawl pawh awm hrang loin an inthurual hle tih a lang. Ngun taka ngaihtuah erawh chuan mipui aiawh tura mipuite bawkin an thlan tlinte'n hamṭhatna an ngah lutuk hi mipui tan thik tham a ni a, kan MLA-te hamṭhatna neihte hi a tam khawp mai. Hengte hi tihtawp an tum a nih loh chuan tute'n emaw titawp turin an ti ngawt thei tawh lo a, kan rama mipui khawsak a harsat dan en hi chuan MLA-te hamṭhatna an inpek hi chu a tam lulai deuh chu a ni.
Heng zinga buhfai leh chini quota an neih tihtawp a ni tur hi mipui hmakhua ngaih vang nge, sorkar sum indaih lohna nasat vang, tihte pawh chhut theih a ni a. Tun hnaia buhfai man a to tak hnua VIP quota tihtawp a nite pawh hi sorkar mualpho tur khuhna remchangah pawh puh theih dan a awm ang.
Engpawhnise VIP nih vanga invulhna leh mahni tana ṭha tur zawnga invurna lam rawngkai, buhfai leh quota tihtawp a ni tur hi chu thil lawmawm tak chu a ni e.