Mizoram ramrî vil uluk a ngai

Mizoram Home Minister chuan ZPM sorkar hnuah Mizoram leh Assam ramri bâwr, a khawi lam mah mahin kut an thlak phal lohna hmunah status quo bawhchhiatna thar a la awm loa an hriat thu July 29, 2024 khan a sawi.

Home Minister-in status quo bawhchhiatna thar a awm loa an hriat thu a sawi tûk, July 30 khan MNF, Serlui North Block chuan thuchhuah an siamah, Assam lamin Vairengte Sabual velah kawng an laih thar nasa a, July 29-ah pawh an la laih reng thu an tarlang thung.

Home Minister-in an hriat dan a sawi leh Serlui North Block MNF thuchhuah hi an inkalh tlat a; a hmuna hmu ve lo leh finfiahna chiang tak nei lo tak chuan a khawi zawk nge dik tih hriat a har.

Sorkar lama thuneitute'n Serlui MNF ho thuchhuah hi a dik nge dik lo tih an finfiah a ṭul a; MNF sawi hi a dik a nih chuan status quo bawhchhiatna a ni theiin a rinawm a, hma an lâk zui lohna turin Mizoram sorkarin a bawhzui ngei tur a ni ang.

Kum hmasa lamah khan police-te inkâp hial khawp leh thihna hial thleng khawpin ramri-ah inbeihna a lo thleng tawh a; ram humhalh tura khatih laia sorkar hmalakna a chhuanawm viauah mipuiin kan ngai niin a lang. Mizo mipuiin kan hmuh tam leh kan paltlang tam Vairengte lamah chuan tun hmaa Mizote'n kan la luah ngai loh thlengin kan luah tawh a, a lawmawm. Mahse, Mizo mipuiin kan hmuh tam loh lam - Saihapui-V lam ram kan chán duai ve tho a, Bairabi lamah kan chána sawi a ni bawk.

Vairengte lama kan hlêp aiin Saihapui-V leh Bairabi lama kan hlohte hi a zau zawk mai thei. Mizote'n kan luah chin ram hloh ṭhen a nih tawh loh nan sorkarin ramri uluk taka a vil a ngai a, tuna Mizote'n in leh huan/lo atana kan luah chin na nâ nâ hi chu huaisen tak leh na taka humhalh a ṭul a ni.