Sairang thlenga rél lut tur hi

Bairabi leh Sairang inkar rél kawng siam mekah Hortoki thlengin siam zawh a nih tawh a, Bairabi-Hortoki km. 16 chin bik chu rêl tlan tak takna atan a ṭhat tâwk leh ṭhat tâwk loh August 1, 2024 khan Commissioner of Railway Safety hoin thuneitute'n an endik a; an hmuh dan erawh hriat a ni rih lo.

Sairang thlenga rél kawng siam mekah hian Hortoki chawhmun thleng bik chu rél kawng siamnaa bungruate thiar nan hman a ni mek tawh a; July 2025-ah Sairang chawlhhmun thleng siam zawh hman tum a ni bawk.

Mizoram chhungril zawka rêl rawn lut turah hian Mizoram mipui ngaihdan a inang lo niin a lang. Ṭhenkhatin ṭha an tih viau laiin, ṭhenkhat chuan hnam dang an tam phah dawn nia a lang avangin inchîmralna kawngkáah an ngai a, ṭha an ti lo thung.

Mizoram chhungah thûk zawka rêl lo lut tur hian ṭhatna tam tak a neih rualin, ṭhat lohna pawh a nei ve ngeiin a rinawm. Hmasawnna reng reng hian ṭhatna a neih rualin, ṭhat lohna a nei ṭhin a; a pawimawh ber chu - a ṭha zawnga hman thiam a ni.

Sairang thlenga rél rawn lut tur pawh hian ṭhatna tam tak a nei ngei ang tih a chiang. Khualzin tan senso tlêm zawka zin theihna a ni ang a, ni tin mamawh thil chi hrang hrangte pawh a tlâwm phah theiin a rinawm. Heng lo pawh hi ṭhatna tam tak a awm ang. A ṭhatnate hi Mizo mipuiin kan hmuh thiam a ngai.

Rêl lo lut avanga inchîmral hi hlauh viau tur niin a lang lo. Mizote hi kan rinawm a, kan taimâk phawt chuan rêl lo lut pawh ni se, chîmral kan ni kher lo ang. Kan rinawm loh a, kan taimâk loh a, thawh hreh kan ngah lutuk chuan rél rawn lut lo pawh ni se, keimahni ngeiin chîmralna kawngka zau takin kan hawng tho ang.

Rêl rawn lut tur avangin mipuiin rilru kan lo buatsaih ṭhat a ngai a, sorkar hotute pawh an lo inbuatsaih ṭhat a ṭul. Hnam dang an pun belh ngei dawn a, ILP leh a kaihhnawih thil hrang hrangte thuneitute'n dik tak leh khauh taka an kenkawh a ṭul dawn a ni.