Zangnadawmna

Serkhan-Bagha kawngpui zauh hna thawh mek chu zang­nadawmna chungchangah harsatna a awm leh a; PWD-in an duh tâwk aia zau kawng laih a nih avangin, kawng laih sa teh fel vek tawh chu tizîm leh tura tih a ni.

Mizoramah tun hnaiah zangnadawmna vanga harsatna thleng a tam hle mai a, Serkhan-Bagha kawngpui zauh meka zangnadawmna vanga buaina a awm hi thil pawi tak a ni. He kawngpui hi ṭha taka peih fel thuai ni se, Mizo mipui tana kawng pawimawh tak a ni dawn a, he hna kalpui mek tikhaihlak thei tur zangnadawmna pek dan tura harsatna thleng hi a zialo hle a ni.

Tun hnaiah zangnadawmna vanga buaina hi a awm ta fo mai a, Serkhan-Bagha kawng laih buaina hi kher lo, zang­nadawmna lak theihna tur chi thil danga buaina a awm fo chhan chu sorkar official ṭhenkhatte thiam loh a nih châng a awm. Sorkar official-te hi project lian tham awm tur hre hmasatu an ni a, anni hian khawi hmunah nge hnathawh a nih dawn an hria a, anni zinga mi duham ṭhenkhat hian an hlawkna tur ûmin zangnadawmna dawn ve theih dan an ngaihtuah a, zangnadawmna hmanga inti lian ta sorkar hnathawk sawi tur an awm nual.

Zangnadawmna lâk chung­changah hian politician-te pawh an bang lo a, anni hi zangnadawmna lak dana hmingchhe hlei hlei an ni hial awm e. Kan politician langsarte pawh hi tun hmaa zangnadawmna an lak hnemzia mipui vantlangin an hriatte an ni a, zangnadawmna an lakte hi dan dik tak pawh lo ni teh reng se, anni ram awmna khera sorkar project lian a awm fuh chat zel hi mipui ngaih chu a ṭha thei chuang lo.

Zangnadawmna vanga buaina tam tak lo tawk tawh Mizo mipuite hian project ṭha tak tur zangnadawmna vang bawka a buai leh hi an phal tawh dawn lo a, tun hnaia Serkhan-Bagha kawngpui zauh hna thawh meka thil awm dan pawh hi ngun takin an thlir dawn a, thil fel lo a awm a nih chuan mipuiin an ngaidam thei ngai dawn lo a, felfai takin he buaina hi chinfel ni rawh se.