Rangvamual

Tun hnai khan Rangvamuala NH-54 kawngpui thlang lamah hmeichhe ruang chhar a ni a; a thattu nia hriat a pasal chu police-te'n an man.

Aizawl khawpui daia awm Rangvamual hi hmun ualau tak leh hmun nuam tak a ni a; nimahsela zu zawrhna hmunpui anga hman a nih vangin thil ṭha lo tam tak a thleng tawh ṭhin. Tun hnaiah helai hmunah hian ruang chhar a ni leh ta a, helai hmunah hian tualthihna pawh a thleng tam tawh hle a ni.

Sorkarin zu khap burna dan MLTP Act a hman chhung zawngin Rangvamual leh a chhehvela zu zawrh hi an tirem thei lo a ni ber a, tlawmngai pawlte nen ṭangin theihtawp chhuah mah se zu zawrh hi an titawp thei tak tak lo. Dan loa zu zawrhna hmunpui ni ta chu dan loa thil tihna remchangah an hmang zui a, ruihhlo tawlhtute tawmkûk ang maia a chan chângte pawh a awm a, thil ṭha lo tam tak tihna hmunah an hman phah ta ṭhin.

Rangvamualah hian mi fel tak tak, zu leh thil ṭha loa inhnamhnawih duh lo an awm­laiin he khua leh a chhevela pêm lut tharte hian zu zawrh tum rana lutte an ni hlawm a, dan loa khawsa India khua leh tui ni lote pawh an awm. Heng mite hi a khaw mi leh sa, nunphung pangngaia awm duhte tana mi hnawksak an ni a, an duh ang thâla an tâl theihna tur hmun a awm hi a ṭha lo hle a ni.

Tunah MLPC Act hman a ni ṭan ta a, tun thlengin Rangvamual hi a awm dan a la ngai reng niin a lang. Aizawl khawpui dai maia duh duh tih theihna ang mai hmun a awm hi a dik lo a, sorkarin ṭhahnemngai takin he hmun leh a chhehvel hi thian fai se, hmun nuam leh ralmuanga a awm theihna turin ke pên rawh se.