Total Bandh

MNF party chuan sorkara an lungawi lohna lantirin total bandh an buatsaih a, tun hnaiah Mizorama total bandh huaihawtin mipui thlawp a hlawh ṭha ṭhin hle.

Tun hnaiah eng pawl pawhin total bandh buatsaih se, mipuiin an thlawp ṭhain hnathawh tuma chhuak an awm ta ngai meuh lo. Tun hma kha chuan total bandh neih a nih hian sorkarin thuchhuah siamin office kal ngei turin sorkar hnathawkte a hriattir ṭhin a, hei hi tunah chuan a awm tawh ngai lo niin a lang.

Sorkar laka lung­awi lohna lantirin eng pawl pawhin total bandh buatsaih se, sorkarin thu leh hla a nei ngai ta lo a ang ber. Sorkar hian bandh hi a thlawp ve ta chu a ni hauh lo a; nimahsela mipuite chu bandh thlawp lo turin a hrilh tawh ngai lo a, a hnathawkte ngei pawh an hna chhunzawm turin a hrilh ngai lo. Total bandh neih nia hnathawk lote chungah pawh sorkar thikthu a chhe ngai lo a, an inhrethiam tlang a ni ber mai.

Total bandh hi eng pawl pawhin an la buatsaih leh thei a, tuna kan kal danah hi chuan 'chawlh' a ni tawp mai a, dawrkai tam tak chawlh nei ve ngai lote tan phei chuan chawlh hah­damna remchang tak a ni. Hetihlai hian total bandh avanga sorkarin sum a hloh zatte leh mimalin sum an hloh nasatzia te, mi tana harsatna a thlen dante hi kan chhut tel a ṭha hle a ni.

Sorkar lakah a ni emaw, eng lakah pawh lungawi lohna kan neihin total bandh thleng kher loa lungawi lohna lantir dan zawn thiam hi a ṭha a, total bandh nghawng hi a nat ṭhin em avangin total bandh pumpelh zawnga kal tum hram hi a ṭha hle a ni.