NDMA-in Mizote huai min ti

National Disaster Management Authority (NDMA) technical expert-te chuan August 1, 2024 khan Mizoram Disaster Management & Rehabilitation (DMR) Minister a pisaah an kâwm a; Mizote chu in sa huai an tih thu an sawi.

NDMA technical expert-te hian tunhnaiah ni thum chhung chu kumin fûra Mizorama leimin leh a kaihhnawih thil dangte vanga chhiatna thlen dante a hmunah an rawn endik a; chumi hnuah DMR Minister an kâwm lehin, Mizote chu tlang ram khawpui zingah in sa huai ber kan nih mai theih thu an hrilh a ni.

NDMA mithiamte thil sawi hi ngaihtuah chian ngai tak, Mizo mipuite inenfiahna atana pawimawh a ni. Miin huaisen min tihna hi thil ṭha lam aiin thil ṭha lo lam anga ngaih theih a ni àwm e. An sawi angin, Mizo zinga mi tam tak hi chuan in kan sa huai khawp mai a, khâm pang, tun hmaa in sak theihna tur pawha an ngaih loh hmunah in a ding tam tawh hle.

Mizorama leiminin in a hnâwl telna leh miin an thih phah hialnate hi a tam zawk chu hmun âwih tak a niin a hriat a; ṭhenkhat chu mi tam takin in an sak ngam lohna tur hmun a ni ang. Chhiatna rapthlak kan tawh loh nan kan fimkhur lehzual a ngai tak zet.

NDMA mithiamte'n building regulation ṭha neih a pawimawh thu te, tui luankawr (drainage system) mumal loh vangin chhiatna rapthlak zawk a la thlen palh theih thu an sawite hi Mizote'n kan ngaih pawimawh a ṭul.

Huaisen hi a ṭha a, mi dâwihzep chuan ngaihnêp an hlawh ṭhin; NDMA-in huai min tihna erawh hi chu huaisenna ṭha a ni lo. Hmun âwih leh khâm panga in sak chungchangah hi chuan huai viau lo ila a ṭha zawk ang.