Dan kenkawh tak tak ngam a ngai

Aizawl Municipal Corporation chuan August 2, 2024 khan Ṭhuampui leh Falkland Veng inkar kawngpui kama phalna nei loa thlai leh thei zuarte chu an dawr khâr turin a hriattir.

Ṭhuampui leh Falkland inkara thlai leh thei zuarte hi phalna pe theitu AMC phalna la loa dawr siam an nih hmel. Chutih laiin, Ṭhuampui Local Council remtihnaa ṭhu an ni a, Ṭhuampui LC-ah chhiah (fee) thla tin Rs 500 an pea sawi a ni. Ṭhuampui LC-in pawisa chawitirin an venga kawngpui kamah mi eng emaw zat thil an zawrhtir laiin, AMC-in tihtawp a tum ve thung. AMC leh Ṭhuampui LC-te hi an inhre pawh lo niin a lang a, a zialo viau mai.

AMC danah chuan AMC hi Aizawl khawpui chhunga thil zawrh leh dawr hawn phalna pe theitu a ni. Chutih laiin, hmun ṭhenkhatah chuan LC-te'n phalna an pek an awm niin a lang. LC-in an huam chhungah thil zawrh phalna leh dawr siam phalna an pe duh a nih pawhin, AMC nen inbiain ruahman tlang thei se a duhawm.

Aizawl khawpuia kenkawh turin AMC hian dan chi hrang hrang a nei a; chu'ngte chu mipui zawm turin a kalpui ṭhin a, dante chu zâwm turin mipui a ngen ṭhin bawk. Mahse, mipuiin dan an zawm ṭhat lohin dan kenkawh leh dan anga hmalak zui kawngah AMC hi a chak tâwk lo deuh em ni aw tih tur a ni. Dan lekkawh kawngah AMC an chak lehzual a ngai a, dan zâwm lote lakah 'action' an lâk tak tak ngam a ṭul.

Retheihna leh eizawnna chhuanlama sorkar leh thuneitute kar tlat an awm thei a, chutianga miin an kar tlat tawh chuan khawngaihtu pawh an nei nual ṭhin. Mahse, thuneitute tan mi tlem tête eizawnna ringawt ngaihtuah theih a ni lo. Dan loa thil tih a awm a nih chuan mi eizawnna pawh ni se, dan anga kal a, tihtawp ngam hi ram leh hnam kal zel tur atan thil ṭha zawk a ni ang.