Thurawn pawm thiam sorkar

Sorkarin thupek thar a siam a, gas bur thun khahna hmun Mualkhang leh Aizawl inkara gas phur motor-te chu, kawnglaka gas bur an tihchingpen tawh lohna turin vengtu a dah tawh dawn a ni.

Tun hnaiah Central YMA duty-ten gas bur tichingpen lai an man fo ṭhin a, thuneitute hnen an thlen pawhin a ziaawm phah hlei thei lo a. Mualkhang leh Aizawl inkar, kilometre 30 emaw chauh chhungah hian nasa takin gas bur hi tihchingpen a ni ṭhin tih hi mipuiin kan hria a, sorkar pawhin a hria a, mahse a reh thei lo. YMA-in
ṭha-hnemngaih vang chauhin ven hna a thawk a, kuang lo nawra puh an hlawh a, mahse sorkar tan ven hneh a harsa deuh a ni mai thei, gas tihchingpen hian hluar lam a pan zel a ni. Tun hnaiah YMA-ten nasa zawka thawm an neih a, mipui hriata an puanzar tak hnuah, sorkarin vengtu dah a tum ta a, a lawmawm hle.

Thuneihna hmanga ven a nih chuan a him tawh turah ngaih a ni. Mipuite pawhin beiseina sang tak nen, a man an pek phu tawk gas bur hmuh an tum tawh ngei ang. Tihchingpen tho an dawn erawh chuan an thikthu a chhe zual ngei thung ang. Chu chu hriain, sorkar aiawha vengtute pawhin him takin mipui hnen an thlen a ṭul ang. Gas bur chingpen hi sorkar tan ven hneh loh tham a ni lo a, ven chung pawha a him lo fo a nih chuan, tichingpentu leh a vengtute mawhphurh liau liau a ni tawh ang.

Tun hnaiah Mizo Carbon Products-ten industrial subsidy tam tham tak an dil a, Mizoram sorkarin a dilpui hnuah mi ṭhahnemngaiten an han chik deuh a, thil fel lo inzepa an hriat thu mipui hriatah an puangzar a, sorkar chuan a lo dilpui tawh hnu chu sut lehin, bawhzuisak lo turin hriattirna a chhuah a ni awm e. Tun hma lam pawh-in he firm hian, sorkar dilpuina zarah subsidy tam tham tak a lo dil hmu tawh a ni.

Mizoram state hi hlemhletna laka fihlim pawl tak a ni tih sorkar hotute hian an sawi ṭhin. Gas tihchingpen hnu sem chungchangah te, indus-trial subsidy dik lo dilpui chungchangahte sorkarin mipui chhan zawnga thupek a siam hi a lawmawm a, mipuite thurawn pawm duh sorkar kan nei hi a vanneihthlak hle. Tun chinah chuan, thil dangah pawh, dik lo tih hriat chian chu vantlang hriata nawr leh thurawn kher nghak loin, mahni thua siam ṭhat hna thawk zel tawh turin, mipuiten sorkar hi an beisei tawh ngei ang.