Mamit leh Karimganj DC inbia hi

Mamit district chhung, Thinghlun khaw daia Mizo pa thlám Assam sorkar mi leh sate'n an hâl chungchangah tun hnai khan Kanhmunah Mamit DC leh Karimganj DC-te an inbia a, ramri chingfel turin state sorkara thuneitu sang zawkah thlen an rél. Hetih lai hian, MZP chuan, Assam sorkarin ngaihdam an dil hmaa DC level-a inbiak chu an dem thu leh an pawm loh thu an tarlang. 

Tun hnaiah Mizo­ram chhung ni ngeia kan pawma Mizo pa thlam chu Assam police silai kengten suasamin an hal a, huan thlai dangte pawh an tichhia. TV news report aṭanga a lan danin Assam police-te hi Karimganj DC hoa thawk chhuak an ni a, amah ngei hian thlam tichhe tur hian thu a pe niin a lang a; he thil thlengah hian Mizoram sorkar lam pawhin Kanhmun Police Station-ah FIR an thehlut a ni.

Mizoram sorkar hian he thila FIR an thehluh hian Assam lama thil tisualtute hi man chhuak turin an umzui ngei dawna a lan laiin, Mizoram lama pawi rawn khawihtua an hotupa ber nia lang Karimganj DC chu Mizoram chhung Kanhmunah a lo lut a, Mamit DC nen an inbe leh lawi si a, he thil thlen dan hi mipui pawhin mak an ti a ni. MZP phei chuan Assam sorkarin ngaihdam an dil hmaa inbiakna hi an pawm theih loh thu an chhuah. 

Hetia a lan dan chuan Karim­ganj DC leh Mamit DC-te inbia hian thuneitu sang zawkte kuta thlen turin an rel tawh a, chuti a nih chuan thlam hala mawhphurtu bera kan ngaih hi chu a insawi fiahlim a ni ta deuh ber a. Kanhmun PS-a Mizoram sorkar lam FIR thehluh hi bawhzui pawh ni ta se Karimganj DC hi va man emaw, man tura thuneitu sang zawka hêk emaw, thubuai va siamsak emaw lam chu a harsa dawn a nih hmel. 

Engpawhnise buaina nasa zawk pumpelh tuma inbiakna a awm hi chu thil ṭha a ni a, remna zawn hi thil tihâwm tak pawh a ni a; nimahsela Mizoram chhunga pawi rawn khawihtu zinga a mawhphurtu bera Mizo mipui pawhin kan puh rawn ber nena kan sorkar aiawhte an han indawr mai hi chu thil danglam tak chu a ni a, MZP-in an pawm lo pawh hi a mak lo.