Yoga

Tun hnaiah khawvel pum huapin International Yoga Day hman a ni a, India sorkar ruahman angin Mizoramah pawh he ni hi hman a ni. Hetihlai hian Mizorama kohhran hrang hrangte chuan yoga ṭha an tih loh thu hi an au chhuahpui mek bawk.

Yoga hi Hindu sakhaw zuitute thil kalpui bik anga ngaih a ni ṭhin a, tun hnaia sorkarin ama hnuaia programme pakhat anga a kalpui ta hian sawi a hlawh hle. State
ṭhenkhatah chuan sakhaw dang betute mai ni loin state sorkara mi challangte pawhin yoga puala ni bik hman hi an sawisel.

India sorkara thu-neitu ber chu BJP an ni a, anni political party hi Hindu sakhua nena sawi zawm an ni ṭhin. BJP hian yoga chawi vul thar a, India ram mai ni lo India ram pawna Indian awmte pawhin an tuipui theih tura ṭan an la hian chhan a nei tur a ni a, chu chu Indian nihna chawi vul duhna piah lamah sakhaw thil pawh a inrawlh thei awm e. "Tuna yoga an kalpui chiamah hian Hindu sakhaw chawi lar tumna a tel lo," tia hnial chu thil harsa tak a nih hmel.

Engpawhnise India ram hi sakhaw tihbik nei lo ram a ni a, Hindu lam ṭangte hian an duh phawt chuan an sakhaw zirtirna leh a behbawmte tihlarna hi an kalpui a thiang ang. Kristian-te pawhin an sakhuaa mi inlehtir tumin missionary an tir a, Hindu khawpuiahte pawh hmunpui an nei a; Buddhist-te pawhin ṭan an la a, Muslim pawhin theihtawp an chhuah ve bawk.

Hetihlai hian sorkar laipuiin mi zawng zawng zirna in leh sorkar hnathawkte tana yoga kalpui ngei tura a nawr (compulsory) a nih chuan thil dik lo a ni ang a; miin zalenna a neih thiang taka hmangin a duh a thlang tur a ni ang. Chutihlai hian Mizorama kan zirna ina Kristian zirtirna kan kalpui a, ṭawngṭai leh thil dang kan zirtirte pawh hi sakhaw dang thlirna aṭang chuan a hnawk ve thei tho awm e.

'Sakhaw thlei bik nei lo' tih hi sawi mai chu a awl a, kan sakhaw ngeng a chhun dawn a nih chuan midangte hi pêl chin pêl ta riau bika hmuh an awl a, kan inzir a ṭha. Chutih rualin yoga kalpui danah hi chuan sorkar laipui lam hian a yoga ngawr ngawr lam aiin sakhaw rim a nam tel avanga tharthawh an ang a, sorkar chakna hmanga sakhaw zirtirna in tihluihtir lam rawng kai hi chu sakhaw dang zuitu tan pawm a harsa ang.