Hmasawnna chhunzawm ngai

MSACS chuan tun hnai khan HIV/AIDS dona kawnga hma latu NGO-te hnenah inchiuna hriau (syringe) 1,76,700 an sem chhuak.

Mizorama HIV/AIDS donaa hnathawktute hian hun rei tak harsatna an tawh chu syringe leh condom sem mipuiin an hrethiam thei lo kha a ni a, tun thleng hian kohhran lamte leh mipui zingah pawh hetiang sem hrethiam lo hi an la awm. Heng mite ngaihdanah chuan syringe leh condom sem hian inchiu duhna a tipung a, sex hman chakna a siam phah niin an ngai a, an ngaihdam hi dem ngawt theih pawh a ni bik lo.

Hetihlai hian hetiang lam luhchilha a awm dan hre chiangtute chuan syringe leh condom sem hi invenna a nih zawk thu an sawi a, HIV/AIDS darh zau zel tur venna hmanraw ṭangkai tak a ni. Ruihhloa inchiu turte hi dan theih an ni tak tak lo a, chuvangin hriau thianghlima an inchiu hian HIV/AIDS darh zel tur lakah an inveng thei ang. Chutiang bawkin sex hmang turte hi khap theih an ni lo a, miin sex an hmang dawn a nih chuan HIV/AIDS a darh zel lohna tura condom hmantir mai hi thil fel zawkah an ngai a ni.

Mizorama HIV/AIDS dona kalpui a nih ṭan tirh kha chuan syringe semtute hi mipuiin an dem a, condom semte chu mipuite sex hmang tura zirtirna anga ngai tlat an awm. Tunah chuan a ram pumin HIV/AIDS do kawngah kan ṭhangharh chho mek a, kan MLA-te pawhin a takin pawisa an thawh tawh a; HIV/AIDS do kawnga hmasawnna awm hi chhunzawm zel a ngai a, tun aia chaka kalpui a ṭul a, bul kan ṭan tawh hi kawng chanvea kir a thiang tawh lo.